AIBA Astanadaǵy bokstan álem chempıonatyn jyl oqıǵasy dep atady
ASTANA. QazAqparat - Halyqaralyq boks qaýymdastyǵy 2016 jyldyń mamyr aıynda ótken bokstan áıelder arasyndaǵy álem chempıonatyn áýesqoılar boksyndaǵy erekshe oqıǵa dep atady.
Nagradany Shveıtsarııadaǵy jyl qorytyndysyna arnalǵan arnaıy kezdesýde Qazaqstan boks federatsııasynyń atqarýshy dırektory Bekjan Bektenovke AIBA tabystady. Júzdesý barysynda uıymdastyrýshylyqtyń joǵary deńgeıi, Barys Arenadaǵy keremet shoý men jobanyń jaqsy júzege asyrylǵandyǵy atap ótildi. Astanadaǵy álem chempıonatyna 65 elden kelgen 295 sportshy qatysty, dep habarlaıdy Qazaqstan boks federatsııasynyń baspasóz qyzmeti.
«Bul tek 2016 jyldaǵy ǵana emes, sondaı-aq áıelder boksynyń 15 jyldyq tarıhyndaǵy úzdik chempıonat, - dedi AIBA áıelder komıssııasynyń tóraǵasy Djoıs Boýen. - Men Qazaqstannyń barlyq qatysýshylarǵa degen qonaqjaılyǵyna, uıymdastyrýshylyq deńgeıine tánti boldym. Qazaqstan boks federatsııasynyń osy nagradamen marapattalǵanyna qýanyshtymyn. Basqa da ulttyq federatsııalarǵa úlgi bolatynyna senimdimin».
Jyl qorytyndysy boıynsha Ózbekstannan álem chempıony Hasanboı Dýsmatov pen Ulybrıtanııadan Nıkola Adams úzdik boksshy dep tanyldy. AIBA bıylǵy jyly jańa syılyqty «ańyzǵa aınalǵan boksshylar» - Legends Award bekitti. Atalmysh syılyqqa Brahım Aslým, Vladımır Klıchko men Merı Kom ıe boldy. Marapattaý saltanatyna Qazaqstannan AIBA vıtse-prezıdentteri Tımýr Qulybaev, Serik Qonaqbaev, QBF atqarýshy dırektory Bekjan Bektenov, QBF halyqaralyq baılanys jónindegi úılestirýshi Dınara Bolatbekqyzy qatysty.
