AI TANYM: Astanalyq muǵalim oqýshylardyń bilimin arttyratyn júıe jasady
ASTANA. KAZINFORM — Astana qalasyndaǵy Barlybek Syrttanuly atyndaǵy № 34 mekteptiń matematıka páni muǵalimi Asqarbek Shoıbasov bilim berý salasyna tyń serpin beretin «AI TANYM» atty ınnovatsııalyq júıe ázirledi. Bul joba oqýshylardyń bilim deńgeıin jasandy ıntellekt (JI) arqyly dál anyqtaýǵa baǵyttalǵan zamanaýı sheshimderdiń biri bolyp sanalady. Bul týraly Astana qalasynyń ákimdigi málim etti.
— Atalǵan bastama bilim alýshylardyń jeke erekshelikterin eskerýge múmkindik beredi. Sonyń nátıjesinde muǵalimder ár oqýshynyń qajettiligine saı jeke oqý traektorııasyn quryp, oqytý protsesin anaǵurlym tıimdi uıymdastyra alady. Joba avtorynyń aıtýynsha, júıe ár oqýshynyń kúshti jáne álsiz tustaryn anyqtap, soǵan sáıkes beıimdelgen tapsyrmalar usynady. Bul óz kezeginde oqýshylardyń oqý tıimdiligin arttyryp qana qoımaı, olardyń pánge degen qyzyǵýshylyǵyn da kúsheıtedi, — delingen habarlamada.
Sonymen qatar, platformada oqýshylardy yntalandyrý júıesi de jan-jaqty qarastyrylǵan. Árbir oryndalǵan tapsyrma úshin upaı (XP) beriledi: jeńil esepke — 3 upaı, ortasha esepke — 5 upaı, qıyn esepke — 10 upaı. Sabaqty tolyq aıaqtaý 25 upaımen, kún saıyn júıege kirý 10 upaımen, al dıagnostıkany ótý 100 upaımen baǵalanady. Jınalǵan upaılardy túrli syılyqtarǵa, bonýs sabaqtarǵa, sertıfıkattarǵa jáne paıdaly keńesterge aıyrbastaýǵa bolady. Mundaı tásil oqýshylardyń oqý protsesine degen turaqty qyzyǵýshylyǵyn qalyptastyryp, olardy úzdiksiz bilim alýǵa yntalandyrady.
— Júıeniń taǵy bir mańyzdy ereksheligi — oqý protsesiniń medıtsınalyq kartaǵa uqsas formatta uıymdastyrylýy. ıAǵnı, árbir taqyryp oqýshy tolyq meńgergenge deıin júıe tarapynan qaıta usynylyp otyrady. Bul tásil bilimdegi olqylyqtardy dál anyqtap, olardy júıeli túrde joıýǵa múmkindik beredi, - dep jazdy ákimdikten.
Sondaı-aq, AI TANYM platformasy jeke repetıtorlar úshin de tıimdi qural bola alady. Óıtkeni ol oqýshynyń naqty álsiz tustaryn aıqyndap, sol baǵytta maqsatty jumys júrgizýge jaǵdaı jasaıdy.
Osylaısha, astanalyq ustaz ázirlegen jańa júıe oqytýdy jekelendirý arqyly árbir oqýshynyń bilim sapasyn arttyryp, onyń áleýetin tolyq ashýǵa baǵyttalǵan mańyzdy qadam bolyp otyr.
Buǵan deıin hqazaqstandyq oqýshy plastık qaldyqtarynan eko-asfalt óndirý tehnologııasyn oılap tapqanyn jazdyq.
