AI taqyryptary Keleshek mektepteriniń oqý baǵdarlamasyna engizildi
ASTANA. KAZINFORM - Memleket basshysynyń bilim berý júıesine jańa tehnologııalyq sheshimder men jasandy ıntellektini engizý týraly tapsyrmasyna sáıkes, «Keleshek mektepteri» jobasy aıasyndaǵy mektepterde «Tsıfrlyq saýattylyq» jáne «Informatıka» pánderiniń mazmunyna jasandy ıntellekt taqyryptaryn engizý jumystary bastaldy — dep habarlaıdy Oqý-aǵartý mınıstrliginiń Y. Altynsarın atyndaǵy Ulttyq bilim akademııasy.
Qazirgi ýaqytta jasandy ıntellekt elementteri bar tsıfrlyq sheshimderdi bilim berý protsesine tájirıbelik turǵyda engizý synaqtan ótkizilip jatyr. Sabaqtar oqýshylardyń jas erekshelikterin eskere otyryp uıymdastyrylady: bastaýysh synyptarda túsindirý oıyn jáne kórnekilik ádisteri arqyly júrgizilse, joǵary synyptarda oqýshylar chat-bottar qurý, derekterdi taldaý jáne etıkalyq jaǵdaılardy sheshý sııaqty jobalyq tapsyrmalardy oryndaıdy. Mundaı tásil synı oılaýdy, tsıfrlyq saýattylyqty jáne tehnologııalarǵa sanaly kózqarasty damytýǵa baǵyttalǵan.
Atalǵan sheshimder elimizdiń birneshe mektebinde, sonyń ishinde Astana qalasyndaǵy №101 «Keleshek mektebinde» pılottyq negizde qoldanysqa engizilip jatyr. Bul mektepte jasandy ıntellektimen jumys isteýge arnalǵan zamanaýı tsıfrlyq quraldar men ádister synaqtan ótip jatyr. Bilim berý ortasyna kezeń-kezeńimen Roqed AI, Aqyl, Google Workspace for Education jáne jasandy ıntellekt negizindegi Kahoot sııaqty sheshimder engizilýde. Bul quraldar oqýshylar men muǵalimder úshin senimdi kómekshige aınalyp otyr. Olardyń qoldanylýy bilim berýdi kórneki, ınteraktıvti jáne ár oqýshynyń jeke qajettilikterine beıimdelgen etýge múmkindik beredi. Jasandy ıntellekt elementteri bar tehnologııalar tsıfrlyq daǵdylardy damytýǵa, muǵalimderdi oqytý úderisin uıymdastyrýda qoldaýǵa jáne oqýshylardyń zamanaýı bilim berý tásilderine degen qyzyǵýshylyǵyn arttyrýǵa yqpal etedi.
«Jasandy ıntellekt qazirgi tańda tek oqytý quraly ǵana emes, sonymen qatar muǵalimniń kómekshisi, oqýshynyń seriktesine aınalyp otyr. Biz tehnologııalar oılaý, kommýnıkatsııa jáne jeke jaýapkershilik daǵdylaryn damytýǵa qyzmet etetin bilim berý ortasyn qalyptastyryp jatyrmyz», — dep atap ótti Y. Altynsarın atyndaǵy Ulttyq bilim akademııasynyń jetekshi sarapshysy Ásem Sarybekova.
Jasandy ıntellektini bilim berý júıesine etıkalyq jáne qaýipsiz engizý máselelerine erekshe mán berilýde. Bilim berý uıymdaryna Y. Altynsarın atyndaǵy Ulttyq bilim akademııasy ázirlegen, jasandy ıntellektini qoldanýdyń etıkalyq standarttaryn qamtıtyn normatıvtik qujattar joldandy. Qazirgi tańda bul standarttardyń mektepterde praktıkalyq qoldanylýy synaqtan ótkizilip jatyr. Sonymen qatar, bilim berýde jasandy ıntellektini qoldanýǵa baılanysty máselelerdi talqylap, ádistemelik qoldaý kórsetetin jáne protsestiń ashyqtyǵy men jaýapkershiligine negizdelgen etıkalyq qaǵıdalardy ustanýyn qamtamasyz etetin Etıkalyq keńestiń quramy bekitildi. Ulttyq bilim akademııasy bul baǵytta mektepterge ǵylymı-ádistemelik qoldaý kórsetýdi jalǵastyrýda.
Osyǵan deıin elimizde joǵary bilim salasy jasandy ıntellekti dáýirine qanshalyqty beıimdelip jatqany týraly jazdyq.