AI-Sana: stýdentter jasandy ıntellekt salasyndaǵy 515-ten astam sheshim ázirledi
ASTANA. KAZINFORM - AI & Digital Bridge 2026 halyqaralyq forýmy aıasynda AI-Sana baǵdarlamasy jobalarynyń kórmesi ótti. Onda Qazaqstannyń 20 joǵary oqý orny stýdentteri ázirlegen jasandy ıntellekt salasyndaǵy úzdik jobalar tanystyryldy, dep habarlaıdy QR Ǵylym jáne joǵary bilim mınıstrliginiń baspasóz qyzmeti.
Іs-sharanyń ashylýynda QR Ǵylym jáne joǵary bilim mınıstri Saıasat Nurbek quttyqtaý sóz sóılep, AI-Sana baǵdarlamasynyń mańyzyn atap ótti.
Mınıstr AI-Sana baǵdarlamasynyń Memleket basshysy qoıǵan Qazaqstandy tsıfrlyq elge aınaldyrý jáne tehnologııany tutynýshy ǵana emes, ony jasaı alatyn jańa býyn qalyptastyrý mindetin iske asyrýdaǵy róline toqtaldy.
-Biz úshin eń mańyzdysy – jastardyń jasandy ıntellekt salasyndaǵy bilimin naqty daǵdyǵa aınaldyrý. Baǵdarlama aıasynda stýdentter tehnologııany daıyn kúıinde paıdalanýmen shektelmeı, onyń múmkindikterin tereń túsinip, praktıkalyq mindetterdi sheshýge jáne óz jobalaryn ázirleýge úırenedi. Bul – eldiń adamı jáne zııatkerlik kapıtalyna salynǵan uzaq merzimdi ınvestıtsııa, – dedi Saıasat Nurbek.
Búginde AI-Sana baǵdarlamasyna 106 joǵary oqý orny qatysady. Onyń alǵashqy kezeńinde stýdentter jasandy ıntellekt negizderi boıynsha 700 myńnan astam sertıfıkat alsa, ekinshi kezeńde 100 myńnan astam stýdent AI-kásipkerlik baǵytynda bilim alyp jatyr. Baǵdarlama aıasynda 515-ten astam jasandy ıntellekt sheshimi ázirlenip, 22 myńnan astam tehnologııalyq jospar jasaldy. Jobalardy 1,5 myńnan astam kýrator súıemeldeıdi.
Kórmede osy baǵdarlama aıasynda ázirlengen úzdik jobalar usynyldy. Olardyń qatarynda qurylys salasyna arnalǵan Prime360.AI analıtıkalyq platformasy, Unitree G1 gýmanoıdty robotyn baǵdarlamalaýǵa arnalǵan Future Lab platformasy men jasandy ıntellekt sımýlıatory, Ortalyq Azııadaǵy ekologııalyq monıtorıngke baǵyttalǵan AgroMindKZ platformasy jáne Qazaqstannyń tarıhy, mádenıeti men ulttyq murasyn zamanaýı oıyn tehnologııalary arqyly tanystyratyn SARDAR jobasy jáne taǵy basqa osy syndy úzdik ázirlemeler boldy.
Іs-sharaǵa sondaı-aq QR Prezıdenti janyndaǵy Jasandy ıntellektini damytý jónindegi keńestiń múshesi Pol Kım, Alpha Intelligence Capital seriktesi ári Mariton Partners kompanııasynyń negizin qalaýshy seriktesi Nı Lı, sondaı-aq Halyk Bank Basqarma tóraǵasynyń orynbasary Narıman Muqyshev qatysty. Olar jasandy ıntellektini damytý, tehnologııalyq jobalardy ilgeriletý jáne ınvestıtsııa tartý baǵyttary boıynsha pikir almasty.
Sonymen qatar forým aıasynda Alpha Intelligence Capital men Astana IT University jáne QazInnovations pen Platonus arasynda yntymaqtastyq týraly memorandýmdarǵa qol qoıyldy. Qujattar jasandy ıntellekt salasyndaǵy jobalardy damytýǵa, bilim berý men tehnologııalyq kásipkerlikti ushtastyrýǵa jáne perspektıvaly ázirlemelerdi qoldaýǵa baǵyttalǵan.
AI-Sana kórmesi stýdentterdiń jasandy ıntellekt salasyndaǵy bilimin naqty jobalarǵa aınaldyryp, jańa tehnologııalyq sheshimderdi damytýǵa baǵyttalǵan múmkindikterdi kórsetti.
Prezıdent Astana AI Film Festival halyqaralyq kınofestıvaliniń ashylý saltanatyna qatysty.
