AI-Sana: qazaqstandyq stýdent aýyl sharýashylyǵy resýrstaryn tıimdi paıdalanýǵa arnalǵan JI sheshimin usyndy
ASTANA. KAZINFORM – Qorqyt ata atyndaǵy Qyzylorda ýnıversıtetiniń 1-kýrs stýdenti Nurdáýlet Dúzenov aýyl sharýashylyǵy ónimdiligin arttyrýǵa jáne resýrstardy tıimdi paıdalanýǵa baǵyttalǵan AgriX ıntellektýaldy platformasyn ázirledi, dep habarlaıdy QR Ǵylym jáne joǵary bilim mınıstrliginiń baspasóz qyzmeti.
Joba jasandy ıntellekt kómegimen egistik alqaptary týraly derekterdi, sonyń ishinde topyraq quramyn, aýa raıy jaǵdaıyn, ylǵal deńgeıin, daqyldardyń damý kezeńderin jáne spýtnıktik aqparatty taldaýǵa múmkindik beredi. Jınalǵan málimetter negizinde platforma aýyl sharýashylyǵy óndirýshilerine sýarý, tyńaıtqysh engizý jáne egistik alqaptaryn kútip-baptaý boıynsha naqty usynymdar usynady.
Platformanyń alǵashqy prototıpi Qyzylorda oblysyndaǵy júgeri alqabynda synaqtan ótkizildi. Júıe ónimdilikti gektaryna 9,8 tonna deńgeıinde aldyn ala boljaǵan. Pılottyq synaq nátıjesinde ónimdilik gektaryna 6-7 tonnadan 10,2 tonnaǵa deıin artqan.
AgriX jobasynyń ǵylymı ereksheligi – jasandy ıntellekt tehnologııalaryn ǵylymı negizdelgen agronomııalyq ádistemelermen ushtastyrýynda. Ónimdilikti boljaý úshin XGBoost mashınalyq oqytý algorıtmi, al daqyldardyń sýǵa qajettiligin esepteý úshin FAO-56 ádistemesi qoldanylady. Qazirgi ýaqytta platforma 62 aýyl sharýashylyǵy daqyly boıynsha málimetterdi qamtıdy.
Jobanyń negizgi maqsaty – aýyl sharýashylyǵynda derekterge negizdelgen sheshimder qabyldaý múmkindigin keńeıtý. Platformany qoldaný sý men tyńaıtqyshtardy tıimdi paıdalanýǵa, aýyl sharýashylyǵy óndirýshileriniń shyǵyndaryn azaıtýǵa jáne ónimdilikti arttyrýǵa yqpal etedi.
-Qazirgi ýaqytta AgriX pılottyq synaq kezeńinen ótip jatyr. Aldaǵy ýaqytta algorıtmderdiń dáldigin arttyrý, synaq júrgiziletin alqaptardyń aýqymyn keńeıtý, platformany topyraq kórsetkishterin naqty ýaqyt rejıminde ólsheıtin datchıktermen ıntegratsııalaý jáne ony kommertsııalyq maqsatta qoldanýǵa engizý josparlanǵan,-delingen habarlamada.
Osyǵan deıin astanalyq stýdenttiń shirigen ónimdi anyqtaıtyn aýylsharýashylyq dronyn oılap tapqany týraly jazdyq.
