AI-Sana baǵdarlamasy: ekinshi kezeńine irikteý bastaldy

ASTANA. KAZINFORM — QR Ǵylym jáne joǵary bilim mınıstrligi «Ǵylym qory» AQ-men birlesip, «Qazaqstan halqyna» QQ qoldaýymen «AI-Sana» baǵdarlamasynyń II kezeńine qatysý úshin 100 000 qatysýshyny aýqymdy irikteýdiń bastalǵanyn jarııalaıdy. Bul týraly vedomstvonyń baspasóz qyzmeti málim etti.

Baǵdarlama Qazaqstan ekonomıkasynyń basym salalary úshin qoldanbaly JI sheshimder ázirleýge qabiletti, jasandy ıntellekt jáne kásipkerlik baǵytynda bilimi bar mamandardyń jańa býynyn qalyptastyrýǵa baǵyttalǵan.

Tirkelý jáne onlaın-testileý 2026 jylǵy 2 naýryz ben 15 naýryz aralyǵynda (saǵat 23:59–ǵa deıin) ótedi.

Tirkelýden ótý jáne testileý joldary:

1. PlatonusApp mobıldi qosymshasy arqyly (Platonus platformasyn qoldanatyn JJOBBU bilim alýshylary úshin);

2. Eger sizdiń ýnıversıtetińiz Platonus platformasynda jumys istemese https://aisanatesting.kz siltemesi nemese https://aisana.gov.kz resmı saıty arqyly kire alasyz.

Oqýdyń bastalýy 2026 jylǵy 25 naýryzǵa, al II kezeńniń aıaqtalýy 2026 jylǵy 10 maýsymǵa josparlanǵan.

Konkýrstyq irikteýge kelesi tulǵalar jiberiledi:

• Qazaqstan Respýblıkasynyń joǵary jáne (nemese) joǵary oqý ornynan keıingi bilim berý uıymdarynyń qazirgi stýdentteri, magıstranttary jáne doktoranttary;
• 2026 jyly «Bolashaq» halyqaralyq stıpendııalyq baǵdarlamasy boıynsha bilim alýshylar;
• AI-Sana baǵdarlamasynyń I kezeńi nemese basqa da bilim berý baǵdarlamalary aıasynda jasandy ıntellekt boıynsha bazalyq kýrstardan ótken qatysýshylar;
• Aǵylshyn tiliniń bazalyq deńgeıi bar úmitkerler (sertıfıkat talap etilmeıdi). Bazalyq aǵylshyn tili deńgeıi baǵdarlama boıynsha odan ári bilim alý JI modelder, kod (Python) jáne beıindi materıaldarmen jumys isteý úshin qajet.

II kezeń baǵdarlamasy týraly

JI bazalyq meńgerýden tehnologııalardy praktıkalyq qoldanýǵa jáne jeke jobalardy ázirleýge ótýdiń sheshýshi kezeńi. Jobany iske asyrýǵa Stanford jáne MIT ýnıversıtetteriniń ókilderin, Kremnıı alqabynyń venchýrlik qorlaryn jáne halyqaralyq bıznes-mektepterdi qosa alǵanda jetekshi halyqaralyq sarapshylar toby qatysady. II kezeń materıaldaryn daıyndaý halyqaralyq sarapshy, Qazaqstan Respýblıkasy Prezıdenti janyndaǵy Jasandy ıntellektini damytý jónindegi keńes múshesi Pol Kımniń jetekshiligimen Zemex Inc. (AQSh) kompanııasynyń qatysýymen júzege asyrylady.

Baǵdarlama qorytyndysy boıynsha qatysýshylar:

• Mashınalyq oqytý modelderin ázirlep, úırete alady;
• Python, Google Colab jáne Jupyter quraldarymen jumys isteıdi;
• Úlken tildik modelder men API-lerdi qoldanady;
• MVP (ónimniń alǵashqy qarapaıym nusqasyn) jasap, startap-ıdeıalardy tekseredi;
• Investıtsııalyq jáne salalyq trendterdi taldaıdy;
• Dızaın-oılaý ádisin qoldanady;
• JI etıkalyq aspektilerin eskeredi;
• Tehnologııalyq startap tujyrymdamasyn qalyptastyrady.

«AI-Sana» baǵdarlamasy Qazaqstan Respýblıkasynyń ǵylymı-tehnologııalyq jáne ınnovatsııalyq damýynyń ulttyq basymdyqtary sheńberinde iske asyrylady jáne eldegi eń iri JI qozǵalysyn qalyptastyrýǵa baǵyttalǵan.

Tolyq aqparat https://aisana.gov.kz resmı saıtynda qoljetimdi.

Aıta keteıik, JI mamandaryn daıarlaý úshin 12 sheteldik JOO tartyldy.