AI-Sana baǵdarlamasy aıasynda 100 myń stýdent JI algorıtmderin meńgeredi
QYZYLORDA. KAZINFORM — Elimizde bilim berý, zertteý jáne qoldanbaly tásilderdi biriktiretin AI-Sana baǵdarlamasy bıyl da jalǵasady. Bul týraly búgin Ulttyq quryltaı aıasynda ótken Bilim-ǵylym sektsııasynda Ǵylym jáne joǵary bilim mınıstri Saıasat Nurbek málimdedi.
Bul joǵary oqý oryndaryna dástúrli bilim berý formatynan ǵylymı-zertteý formatyna kóshýge múmkindik beredi. Baǵdarlama jasandy ıntellekt boıynsha bazalyq bilimnen bastap startaptardy kásibı damytýǵa jáne olardy naryqta masshtabtaýǵa deıin dáıekti damytýǵa baǵyttalǵan.
— Ai-Sana baǵdarlamasyn byltyrdan beri júzege asyryp kelemiz. Osy kúnge deıin 668 myń stýdent oqydy. Elimizdegi barlyq stýdent baǵdarlama aıasynda mindetti túrde jasandy ıntelekt kýrstarynan ótedi. Bul — eń myqty kýrstar. Coursera, HUAWEI, Microsoft, Google tárizdi kompanııalarmen birigip, olardyń kýrstaryn qazaq jáne orys tilderine aýdaryp, stýdentterdi oqytyp jatyrmyz. Bıyl aqpan aıynda baǵdarlamanyń ekinshi ekinshi kezeńi bastalady. Sonyń aıasynda 100 myń stýdent jasandy ıntellektiniń tereńdetilgen algorıtmderin meńgeredi, — dedi mınıstr.
JOO-lar belgilengen úlgidegi elektrondy sertıfıkat bere otyryp, ózderi ázirlegen kýrstar boıynsha stýdentterdi oqyta alady.
— Baǵdarlamany odan ári iske asyrý úshin elimizdiń ár óńirinen 27 «zákirli» JOO iriktelip, bekitildi. Oqý oryndary baǵdarlamany iske asyrý úshin qajetti ınfraqurylym, onyń ishinde JI salasyndaǵy bilim berý baǵdarlamalarynyń, sheteldik seriktesterdiń, esepteý qýattarynyń bolýy sııaqty krıterııler boıynsha irikteldi. Bul JOO-lar AI-Sana baǵdarlamasy boıynsha stýdentter men pedagogıkalyq oqytýshy quramyn oqytýdy qamtamasyz ete otyryp, óz óńirindegi jáne kórshiles oblystardaǵy jobany iske asyrýǵa jaýapty bolady, — dedi Saıasat Nurbek.
AI-Sana baǵdarlamasy elimizde jasandy ıntellektti damytý úshin qolaıly ekojúıe qalyptastyrýǵa baǵyttalǵan. JOO-lar qabyldaý komıssııasynan bastap oqý protsesin súıemeldeý jáne bitirýmen aıaqtaıtyn JOO-nyń aqparattyq ekojúıesin quraıtyn 9 JI agentin ázirledi.
Buǵan deıin Ulttyq quryltaıdyń Áleýmettik-damý sektsııasynda Premer-mınıstrdiń orynbasary — Mádenıet jáne aqparat mınıstri Aıda Balaeva Ulttyq balalar kitaphanasy máselesi týraly oıyn bildirgen edi.