AI-Quryltai jasandy ıntellekt platformasynyń kómegimen alǵash ret zań jobasy ázirlendi

ASTANA. KAZINFORM — Qazaqstanda jasandy ıntellekt kómegimen alǵash ret zań jobasy ázirlendi. AI-Quryltai platformasy arqyly daıyndalǵan «Balalardyń tsıfrlyq jáne aqparattyq qaýipsizdigi týraly» qujat 120-dan astam túzetýdi qamtıdy. Bul týraly Quryltaıdyń baspasóz qyzmeti málim etti.

AI-Quryltai jasandy ıntellekt platformasynyń kómegimen alǵash ret zań jobasy ázirlendi
Foto: Quryltaı

AI-Quryltai ıntellektýaldy ortasynyń kómegimen ázirlengen alǵashqy zań jobasy týraly Quryltaı vıtse-spıkeri Dınara Zákıeva Úkimet saǵatynda habarlady.

Platformanyń kómegimen zań jobasyn ázirleýshi depýtattarǵa tsıfrlyq jáne aqparattyq ortadaǵy balalar qaýipsizdiginiń qazirgi jaı-kúıine keshendi taldaý júrgizildi jáne usynyldy. Oǵan úlken derekter, azamattardyń ótinishteri, ata-analardyń, sarapshylar men qoǵam ókilderiniń naqtylaǵan máselelerin taldaý, sondaı-aq yqtımal syn-qaterlerdi baǵalaý jáne halyqaralyq tájirıbeni zertteý negiz boldy.

Sonymen qatar, 800 myńnan astam normatıvtik quqyqtyq aktiler bazasy biriktirilgen AI-Quryltai sheńberinde arnaıy oqytylǵan zańnamalyq model alǵash ret zań jobasynyń mátinin qurýǵa tikeleı paıdalanyldy. Bul zańnamaǵa engiziletin ózgeristerdiń aýqymy men tolyqtyǵyn arttyrýǵa jáne qaıshylyqtardy boldyrmaýǵa múmkindik berdi.

AI-Quryltai jasandy ıntellekt platformasynyń kómegimen alǵash ret zań jobasy ázirlendi
Foto: Quryltaı

— Máselen, platformanyń kómegimen jańa qaýipter men tsıfrlyq tehnologııalardyń damýyn eskere otyryp, balalardy tsıfrlyq jáne aqparattyq ortada qorǵaý jónindegi sharalar kesheni pysyqtaldy. Bul sharalar barlyq platformalarǵa «ata-ana baqylaýy» tetigin engizýge qatysty bolyp otyr. ıAǵnı, balalarǵa arnalǵan «súzgi» engizilip, sáıkesinshe barlyq tańbalanbaǵan jáne tekserilmegen tsıfrlyq jáne aqparattyq ónimder, qosymshalar, oıyndar balaǵa qol jetimsiz bolady. Sondaı-aq, platformalarǵa barlyq tsıfrlyq ónimderdi, sonyń ishinde qosymshalar men oıyndardy tańbalaý, olardy verıfıkatsııalaý, sondaı-aq qaýipter men buzýshylyqtar anyqtalǵan jaǵdaıda buǵattaý jónindegi talaptardy engizý usynylady. Barlyǵy 120-dan astam túzetý ázirlendi, — dep atap ótti Dınara Zakıeva.

Óz kezeginde Quryltaı depýtaty, jasandy ıntellekt zerthanasynyń jetekshisi Ekaterına Smyshlıaeva AI-Quryltai júıesin engizý arqyly zań shyǵarý qyzmetiniń sapasyn arttyrýǵa arnalǵan ıntellektýaldy orta qalyptastyrylyp jatqanyn atap ótti.

— Eger tsıfrlandyrý qujattardy, rásimderdi jáne ózara is-qımyldy elektrondyq ortaǵa kóshirýge múmkindik berse, AI-Quryltai aqparatpen jumys isteý tásilin sapaly túrde ózgertýge kómektesýi tıis. Bul qoldanystaǵy tsıfrlyq ınfraqurylym negizinde jańa ıntellektýaldy qabat — zań shyǵarý qyzmetiniń ártúrli kezeńderinde depýtattar men Quryltaı Apparatynyń qyzmetkerlerine kómektesetin ózara baılanysty jasandy ıntellekt agentteri men mamandandyrylǵan modýlder júıesin qalyptastyrý týraly bolyp otyr, — dedi depýtat.

Ekaterına Smyshlıaevanyń aıtýynsha, AI-Quryltai ekojúıesi ózara baılanysty bes baǵytty qamtıdy. Olar — ıntellektýaldy analıtıka, zańgerlik modýl, ıntellektýaldy saraptama, retteýshilik áserdi baǵalaý jáne onyń saldaryn modeldeý, sondaı-aq quqyq qoldaný tájirıbesine monıtorıng júrgizý. Aldaǵy ýaqytta jasandy ıntellekt quraldary aýqymdy derekterdi óńdeýge, quqyqtyq qaıshylyqtardy anyqtaýǵa, yqtımal táýekelderdi baǵalaýǵa jáne qabyldanǵan normalardyń qoldanylý nátıjelerin baqylaýǵa múmkindik beredi.

Bul rette depýtat jasandy ıntellekt zań shyǵarý qyzmetinde adamdy almastyrmaıtynyn atap ótti.

AI-Quryltai jasandy ıntellekt platformasynyń kómegimen alǵash ret zań jobasy ázirlendi
Foto: Quryltaı

— Jasandy ıntellekt memlekettik saıasattyń mazmunyn aıqyndamaıdy jáne quqyqtyq sheshimder qabyldamaıdy. Ol mamanǵa normatıvtik-quqyqtyq jaǵdaıdy tolyq kórýge jáne quqyqtyq materıaldy sapalyraq daıyndaýǵa kómektesedi, — dedi Ekaterına Smyshlıaeva.

Depýtattyń aıtýynsha, zań jobasyn ázirleý barysynda AI-Quryltai kómegimen qalyptastyrylǵan barlyq usynystar shaqyrylǵan zańgerler men sarapshylardyń qatysýymen ázirleýshi depýtattardyń tekserýinen jáne qosymsha pysyqtaýynan ótti.

Qazirgi ýaqytta zań jobasy Úkimettiń qorytyndysyn alýǵa joldanýda. Ony pysyqtaý Quryltaıdaǵy jumys toby aıasynda jalǵasady.

Aıta keteıik, buǵan deıin Quryltaı depýtattary eki aptada 18 myńǵa jýyq adammen kezdesip, birqatar mańyzdy taqyryptardy kótergenin jazdyq.