AI-kınonyń ortaq úlgisi ázirge joq — Aızatýlla Hýsseın
ASTANA. KAZINFORM — Álemde AI-kıno endi damyp kele jatqan baǵyttardyń biri. Sondyqtan onyń naqty úlgisi áli qalyptasqan joq. Avtorlar túrli janr men formatta tájirıbe jasap júr. Bul týraly Astana AI Film Festival (AAIFF) negizin qalaýshy Aızatýlla Hýsseın aıtty.
Onyń aıtýynsha, túrli elden túsken myńdaǵan jumysty saralaý AI-kınonyń naqty bir úlgisi áli qalyptaspaǵanyn kórsetken. Keı avtorlar jasandy ıntellekt kómegimen dástúrli kınonyń úlgisin qaıtalaýǵa tyrysady. Endi biri úırenshikti kınoǵa uqsamaıtyn jobalar jasap júr.
— AI-kınonyń baǵyty men úlgisi áli qalyptasyp keledi. Buryn belgili bir baǵyt birneshe aı boıy saqtalatyn. Qazir bári kún saıyn derlik ózgerip jatyr, — dedi Aızatýlla Hýsseın.
Ol ár elden túsken jumystardyń ereksheligine de toqtaldy. Máselen, Ońtústik Koreıadan usynylǵan jobalardyń arasynda nýar men horrorǵa jaqyn týyndylar kóp. Keńse ómirin kórsetetin sıýjetter de jıi kezdesedi.
Qytaılyq avtorlar anımatsııaǵa jıi júginedi. Olardyń týyndylarynan ózindik kórkemdik máner baıqalady.
Qazaqstandyq avtorlardyń jumystarynda ulttyq naqysh pen bolashaq beınesi qatar kórinis tabady. Fantastıkalyq sıýjetterde kıiz úı, dala men robottar kezdesedi.
Aızatýlla Hýsseınniń aıtýynsha, qazir kóńil kóterýge arnalǵan qarapaıym AI-kontent pen tolyqqandy AI-kınonyń arajigin ajyratý qıyn.
— Bireýler dástúrli kınony qaıtalaýǵa tyrysady. Endi bireýler tájirıbe jasap, kınoǵa múlde uqsamaıtyn dúnıe usynady. Biraq sonysymen qyzyq, — dedi ol.
Aızatýlla Hýsseın festıval AI-kınonyń odan ári damýyna yqpal etip, jasandy ıntellekt qoldanylatyn kıno men oıyn-saýyqtyń jańa túrin qalyptastyrýǵa sep bolady dep esepteıdi.
— Festıvalimiz jańa bir úlgi men ataýdyń qalyptasýyna kómektesedi dep úmittenemin, — dedi Aızatýlla Hýsseın.
Buǵan deıin Almas Jalı aldaǵy eki-úsh jylda AI fılmderdi dástúrli kınodan ajyratý qıyn bolatynyn aıtqan edi
