AI kınoındýstrııany qalaı ózgertedi: Elordada ótip jatqan Astana AI Film Festival qandaı jańalyq ákeldi
ASTANA. KAZINFORM – Búginde jasandy ıntellekt tehnologııalary óner men kınematografııa salasyna qarqyndy enip keledi. Astanada ótip jatqan Astana AI Film Festival (AAIFF 2026) halyqaralyq festıvali osy baǵyttaǵy álemdik trendterdi aıqyndaıtyn basty alańǵa aınaldy.
Festıval negizin qalaýshy Aızat Kýseınovtyń aıtýynsha, jasandy ıntellekt kınematografııanyń dástúrli qalyptaryn buzyp, buryn-sońdy bolmaǵan jańa janrlardyń týýyna jol ashyp otyr.
– Buryn kıno áleminde negizgi narratıv pen trendter tek Batystan, Gollıvýd pen Eýropadan taraıtyn. Al qazir biz jasandy ıntellekt arqyly álemniń túkpir-túkpirinen, Senegaldan, Úndistannan, Azııa elderinen kelgen avtorlardyń biregeı týyndylaryn kórip otyrmyz. AI ártúrli halyqtardyń tól mádenıeti men qyzyqty kontseptsııalaryn ekranǵa shyǵarýǵa múmkindik berdi. Kann festıvali dástúrli kınonyń ortalyǵy bolsa, biz Astananyń AI-kınonyń álemdik elordasyna aınalǵanyn qalaımyz, – deıdi Aızat Kýseınov.
Festıval aıasynda arnaıy tańdalǵan «Ómir súrgiń keletin bolashaq» taqyryptyq nomınatsııasynyń da ózindik fılosofııalyq máni bar.
Uıymdastyrýshylardyń sózinshe, Gollıvýd fılmderinde bolashaq kóbine pessımıstik, apatty keıipte beınelenedi. Al bul konkýrstyń maqsaty – avtorlardy pozıtıvti, jarqyn ári jaıly bolashaq týraly týyndylar jasaýǵa yntalandyrý.
Sondaı-aq festıvalge usynylǵan qysqametrajdy fılmderdiń uzaqtyǵy 5 pen 20 mınýt aralyǵyn qamtıdy. Aızat Kýseınov bul saladaǵy tehnologııalyq shyǵyndarǵa da toqtalyp ótti. Bir AI fılmdi jasap shyǵý búgingi kúni 3 000-nan 5 000 dollarǵa deıingi qarajatty talap etedi. Soǵan qaramastan qatysýshylar qazaqstandyq Higgsfield sııaqty ozyq generatıvti júıelerdi tıimdi qoldanǵan.
Eske sala keteıik, Astanadaǵy festıvalge 125 elden 8 000-nan astam ótinim tústi. Halyqaralyq qazylar alqasy 25 fınalısti tańdap aldy. Baıqaýdyń jalpy qory – 2 mıllıon dollar.
3 qazan kúni festıval jeńimpazdary saltanatty túrde marapattalady, al 4 qazannan bastap barlyq fınalısterdiń týyndylary onlaın platformada álem kórermenderine usynylady.
Aıta keteıik, buǵan deıin, Astana AI Film Festival teń quryltaıshysy ári keńes tóraǵasy Almas Jalı AI fılmdi dástúrli kınodan ajyratý qıyn bolatynyn aıtqan edi.
