AI kıno baıqaýynda júlde alǵan qazaqstandyq fılm nesimen qyzyqty
ASTANA. KAZINFORM — Elordada Astana AI Film Festival óz máresine jetti. Úsh kúnge sozylǵan baıqaýǵa álemniń 125 elinen 8 myńnan astam ótinim túsip, olardyń arasynan 25 jumys fınalǵa joldama aldy. Úzdik týyndylardy halyqaralyq qazylar alqasy baǵalap, jeńimpazdardy anyqtady.
Festıval qorytyndysynda qazaqstandyq avtor da minberden kórindi. Myrzahan Jumahannyń It Was Just a Joke fılmi Best Character — «Úzdik keıipker» nomınatsııasynda jeńimpaz atandy.
– Fılmim — komedııalyq janrda. Munda ıt pen onyń ıesiniń aǵasy qarapaıym ázil úshin tóbelese bastaıdy. Sońynda bul naǵyz janjalǵa aınalady, — dep bólisti jeńimpaz Jibek Joly telearnasynyń »Búgin Live» baǵdarlamasynda.
Avtordyń aıtýynsha, ol týyndyny ázilge qurylǵan jeńil komedııa retinde jasaǵan.
— Básekelestikke baılanysty qatty qobaljydym. Óıtkeni munda talantty ári myqty mamandar óte kóp. Barlyq qatysýshy óz fılmine kóp ýaqyt jumsaǵan, — dedi spıker.
Avtordyń jetistigimen qatar, festıvaldiń basty júldesi de halyqaralyq deńgeıdegi básekeniń joǵary bolǵanyn kórsetti.
Astana AI Film Festival Gran-prıin latvııalyq Nıkolaı Shestak ıelendi. Onyń The First Honest Day fılmi І orynǵa laıyq dep tanylyp, avtorǵa 450 myń dollar syıaqy berildi. ІІ oryn ıegeri 200 myń, al ІІІ oryn ıegeri 100 myń dollar aldy. Osylaısha festıvaldiń jalpy júlde qory 2 mıllıon dollar boldy.
Festıval tek baıqaý jumystaryn baǵalaýmen shektelgen joq. Negizgi baǵdarlama aıasynda avtorlar men kreatıvti ındýstrııa ókilderiniń qatysýymen iskerlik kezdesýler men paneldik pikirtalastar uıymdastyryldy.
Aıta keteıik, úsh kún ishinde festıval jasandy ıntellektini kıno óndirisinde qoldanatyn avtorlardyń basyn qosyp, halyqaralyq shyǵarmashylyq alańǵa aınaldy.
Eske salaıyq, buǵan deıin kınoteatrlarda qandaı jańa fılmder shyqqanyn bólisken edik.
