AI-fılmder baıqaýy: 1 mıllıon dollardy kimder uta alady
ASTANA. KAZINFORM — Astana AI Film Festival halyqaralyq AI-fılmder baıqaýy jarııalandy. Oǵan álemniń túkpir-túkpirindegi kreatorlar qatysa alady. Bul jóninde festıval uıymdastyrýshysy Almas Jálı málimdedi.
— Festıval bıyl 28 qyrkúıek pen 1 qazan aralyǵynda elordada Astana AI Week — jasandy ıntellekt aptalyǵy aıasynda ótedi. Bul AAIFF-ti eldegi iri tehnologııalyq is-sharalarmen baılanystyryp, festıvaldiń halyqaralyq mártebesin kúsheıtedi, — dedi ol jobany tanystyrýǵa arnalǵan baspasóz konferentsııasynda.
Almas Jálıdiń aıtýynsha, baıqaý baǵdarlamasy eki sektsııadan turady: «The future worth living in» («Ómir súrýge turarlyq bolashaq») taqyrybyna arnalǵan negizgi sektsııa jáne úzdik rejıssýra, vızýaldy til, oqıǵa, kontseptsııa jáne keıipker nomınatsııalary boıynsha ashyq sektsııa.
Basty talap — fılm full AI tehnologııalary arqyly jasalýy tıis. Demek, jasandy ıntellekt qosymsha qural retinde emes, týyndyny jasaýdyń negizgi ınstrýmenti retinde qoldanylýy shart.
Baıqaýǵa qatysý tegin jáne jas ereksheligine nemese kásibı tájirıbesine qaramastan barsha nıet bildirýshige ashyq. Úmitkerler uzaqtyǵy 10 mınýtqa deıingi qysqametrajdy AI-fılm ázirlep, ony jobanyń sıpattamasymen birge aaiff.ai festıval platformasyna júkteýi qajet.
Іrikteý qorytyndysy boıynsha AAIFF komandasy men halyqaralyq sarapshylar negizgi sektsııadan 10 jáne ashyq sektsııadan 15 jumysty tańdap alady.
Fınalısterdi kınoındýstrııa, AI-qoǵamdastyq jáne creative tech salasynyń ókilderinen quralǵan halyqaralyq qazylar alqasy baǵalaıdy.
Ótinim qabyldaý 2026 jylǵy 15 tamyzǵa deıin jalǵasady. Baıqaý fınalısteri qyrkúıek aıynda jarııalanyp, kórsetilimder men jeńimpazdardy marapattaý rásimi Astana AI Week aıasynda Astana qalasynda ótedi.
Al festıvaldiń jalpy júlde qory — 1 mıllıon AQSh dollary.
Sondaı-aq, fılmder aǵylshynsha bolǵany jón. Al sheteldik qatysýshylar portýgal, qytaı t.b. tilderdegi ónimderin usynsa, onda aǵylshynsha sýbtıtr qosý talap etiledi.
Aıta keteıik, buǵan deıin Qazaqstanda AI-startaptar men zertteýlerdi qoldaýdyń jańa baǵdarlamalary iske qosylatynyn jazǵanbyz.
