AI & Digital Bridge halyqaralyq baılanystardyń altyn kópiri retinde tabysty qyzmet etýde - Prezıdent
ASTANA. KAZINFORM – Memleket basshysy AI & Digital Bridge – 2026 halyqaralyq forýmynda sóz sóıledi, dep habarlaıdy Aqorda.
Qasym-Jomart Toqaev is-sharaǵa qatysýshylar aldynda sóılegen sózinde búginde Digital Bridge forýmy Eýrazııadaǵy bedeldi jáne tanymal tehnologııa alańyna aınalǵanyn atap ótti.
– Munda álemniń tehnologııalyq damýyna zor úles qosyp júrgen bilikti mamandar jınaldy. Forým aıasynda jańa ıdeıalar men tyń bastamalar usynylady, tıimdi baılanystar ornatylyp, naqty jobalar iske qosylady. Sondyqtan Digital Bridge halyqaralyq forýmyn shyn máninde jańashyl, jasampaz jáne zııatker azamattar bas qosatyn biregeı jıyn dep aıtsaq, artyq bolmasy anyq, – dedi Memleket basshysy.
Prezıdent qazirgi asa qarqyndy, qubylmaly jáne ozyq zamanda jańa tehnologııany damytýdyń mańyzyna toqtaldy.
– Kúlli álem jurtshylyǵy jasandy ıntellektiniń damýyna aıryqsha nazar aýdaryp jatyr. Sebebi jasandy ıntellektiniń yqpalymen ónerkásip, qarjy, bilim, ǵylym, memlekettik basqarý jáne jalpy adam ómirinde túbegeıli ózgerister bolyp jatyr. Oǵan bárimiz de kýá bolyp otyrmyz. Osy oraıda, AI & Digital Bridge forýmynyń mazmuny da jyl ótken saıyn jańa sıpatqa ıe bolýda: jańa ózekti máseleler paıda boldy, qatysýshylardyń aýqymy da ulǵaıdy. Forýmda tsıfrlandyrý taqyrybynan bólek, esepteý ınfraqurylymy, aýqymdy tildik modelder, robot tehnıkasy, ındýstrııa salasyndaǵy jasandy ıntellekt, ǵylym, tehnologııa salasyndaǵy zańnama men qaýipsizdik máseleleri jóninde pikir almasýlar ótýde. Osylaısha, AI & Digital Bridge jańa tehnologııalar salasyndaǵy halyqaralyq baılanystardyń altyn kópiri retinde tabysty qyzmet etýde. Forýmnyń túpki maqsaty da, basty mindeti de, mıssııasy da – osy, – dedi Qasym-Jomart Toqaev.
Aıta keteıik, Toqaev pen BAÁ delegatsııasy kólik-logıstıka salasyndaǵy yntymaqtastyqty damytýdy talqylady.
