AI & Digital Bridge forýmynda qandaı kelisimder men memorandýmdarǵa qol qoıyldy

Forým aıasynda jasandy ıntellekt, tsıfrlyq aktıvter, tsıfrlyq ınfraqurylym, bilim berý, ǵylymı zertteýler, venchýrlyq qarjylandyrý jáne startaptardy qoldaý salalarynda memorandýmdar men kelisimderge qol qoıylýda. Qujattar birlesken jobalardy iske qosýdy, ınvestıtsııa tartýdy, tehnologııalar men saraptama almasýdy, sondaı-aq halyqaralyq yntymaqtastyqty órkendetýdi kózdeıdi.

Bul qujattardyń qabyldanýy jasandy ıntellekttiń bolashaǵyn sóz etýden naqty tehnologııalyq jáne ınvestıtsııalyq jobalardy júzege asyrýǵa — esepteý qýattaryn qurý men JI mamandaryn daıarlaýdan bastap, tsıfrlyq qarjyny, Web3 baǵytyn jáne tehnologııalyq bıznesti qoldaýdyń jańa tetikterin damytýǵa bet alǵanymyzdy aıqyn kórsetedi.

Osy turǵyda AI & Digital Bridge 2026 alańynda jasalǵan kelisimder Qazaqstannyń tehnologııalyq ekojúıesiniń birneshe mańyzdy baǵytyn — ınfraqurylym, ınvestıtsııa, bilim berý, tsıfrlyq qarjy jáne halyqaralyq tehnologııalyq áriptestikti birden qamtıdy.

Qazaqstannyń Jasandy ıntellekt jáne tsıfrlyq damý mınıstrligi men MultiBank Group tsıfrlyq aktıvter salasyndaǵy yntymaqtastyq týraly memorandým jasasty.

AI & Digital Bridge 2026 forýmy aıasynda Qazaqstan Respýblıkasynyń Jasandy ıntellekt jáne tsıfrlyq damý mınıstrligi men MEX Group Worldwide Limited (MultiBank Group, BAÁ) tsıfrlyq aktıvter jáne taratylǵan tizilim tehnologııalary salasyndaǵy seriktestikti nyǵaıtý baǵytynda mańyzdy qujatty qabyldady.

Qujatqa QR Jasandy ıntellekt jáne tsıfrlyq damý vıtse-mınıstri Ǵızzat Baıtursynov pen MultiBank Group kompanııasynyń bas kommertsııalyq dırektory Mark Aspınall qol qoıdy.

Taraptar birneshe baǵyt boıynsha ózara is-qımyl jasaýǵa ýaǵdalasty: tsıfrlyq aktıvterdi retteý máselelerin talqylaý kezinde memlekettik organdarǵa saraptamalyq qoldaý kórsetý, tsıfrlyq aktıvter naryǵy men taratylǵan tizilim tehnologııalaryn damytý, óńirlik krıptohab qurý baǵytynda AHFO-men birlesip jumys isteý, memlekettik qyzmetterde blokcheın tehnologııasyn qoldaný, sondaı-aq azamattardyń qarjylyq jáne tehnologııalyq saýattylyǵyn arttyrýǵa baǵyttalǵan bilim berý jobalaryn júzege asyrý.

Sonymen qatar MultiBank Group Qazaqstanda óńirlik keńse ashyp, jańa jumys oryndaryn qurýdy josparlap otyr.

Shtab-páteri Dýbaıda ornalasqan kompanııa 18-den astam retteýshiniń baqylaýymen jumys isteıdi jáne 100-den astam elden kelgen 2 mıllıonnan astam klıentke qyzmet kórsetedi. Yntymaqtastyq aıasynda MultiBank Group Qazaqstanǵa 30-dan 40 mıllıon AQSh dollaryna deıin ınvestıtsııa qurýdy josparlap otyr, onyń ishinde óńirlik keńse ashý men tsıfrlyq aktıvter naryǵyn damytý sharalary da bar.

«Qazposhta» tsıfrlyq aktıvter men ıslam qarjylandyrýy salasyndaǵy seriktestikti keńeıtedi

«Qazposhta» AQ Abhibha Technologies Pte. Ltd. kompanııasymen ózara túsinistik týraly memorandýmǵa qol qoıdy. Qujat tsıfrlyq aktıvter jáne soǵan baılanysty tehnologııalar salasyndaǵy uzaq merzimdi áriptestikti damytýdy kózdeıdi.

Taraptar «Qazposhtanyń» mobıldi qosymshasyna tsıfrlyq aktıvterge qol jetkizý sheshimderin kiriktirý múmkindigin zertteýdi josparlap otyr, bul Qazaqstan azamattarynyń osyndaı qyzmetterdi paıdalaný múmkindigin keńeıtýi múmkin. Sondaı-aq áriptestik úlgileri, ónimderdi iske asyrý tetikteri, zańnama talaptary jáne tehnıkalyq ıntegratsııa máseleleri qarastyrylady.

Budan bólek, Eýrazııalyq damý banki men «Qazposhta» AQ kompanııanyń bólshek klıentterine arnalǵan ıslamdyq qarjylandyrý qaǵıdattary boıynsha tsıfrlyq tutynýshylyq qarjylandyrýdyń pılottyq jobasyn iske asyrý jónindegi tehnıkalyq járdemdesý memorandýmyna qol qoıdy.

Bes ýnıversıtet «AI+X» modeli boıynsha kadrlar daıarlaý úshin kúsh biriktirdi

A. Baıtursynuly atyndaǵy Qostanaı óńirlik ýnıversıteti, Qazaq ulttyq qyzdar pedagogıkalyq ýnıversıteti, Qazaq jasandy ıntellekt zertteý ýnıversıteti, Qozybaev atyndaǵy Soltústik Qazaqstan ýnıversıteti jáne Serikbaev atyndaǵy Shyǵys Qazaqstan tehnıkalyq ýnıversıteti «AI+X» kadrlar daıarlaý modeli boıynsha bilim berý baǵdarlamalaryn júzege asyratyn Ýnıversıtetter konsortsıýmyn qurý maqsatynda birikti.

Bul bastama ártúrli kásibı jáne salalyq baǵyttarda jasandy ıntellekt quraldaryn qoldana alatyn mamandardy daıarlaý isin damytýǵa baǵyttalǵan.

Narhoz ýnıversıteti men CYBERPACK bilim berý jáne tehnologııalar salasynda áriptestik ornatady

«Narhoz ýnıversıteti» KEAQ pen «CYBERPACK» JShS ózara yntymaqtastyq týraly memorandýmǵa qol qoıdy.

Qujat bilim berý salasyndaǵy ǵylymı-tehnıkalyq ózara is-qımyldy damytýdy, jastardyń zertteý jáne jobalaý bastamalaryn qoldaýdy, talantty stýdentterdi anyqtap, damytýǵa jaǵdaı jasaýdy, sondaı-aq birlesken bilim berý sharalaryn uıymdastyrýdy kózdeıdi.

Astana IT University men SOLANA SUPERTEAM KZ Web3 salasyndaǵy bilim berýdi damytady

Astana IT University pen «SOLANA SUPERTEAM KZ» korporatıvtik qory blokcheın-tehnologııalar, Web3 jáne Solana ekojúıesi salasyndaǵy yntymaqtastyq týraly memorandýmǵa qol qoıdy.

Seriktestik stýdentterdiń tájirıbelik daǵdylaryn damytýdy, tsıfrlyq ekonomıka úshin kadrlar daıarlaýdy, birlesken bilim berý baǵdarlamalaryn, hakatondardy jáne tehnologııalyq kásipkerlik salasyndaǵy basqa da bastamalardy júzege asyrýdy kózdeıdi.

Qazaqstanda jańa data-ortalyq paıda bolady

2 qazanda AI & Digital Bridge 2026 aıasynda «Qazaqtelekom» AQ, «KT-TELEKOM» JShS jáne FireBird AI KZ LTD data-ortalyq qurylysyn bastaý týraly kelisimge qol qoıdy. Qujat zamanaýı data-ortalyq salý jobasyn iske asyrýǵa, tsıfrlyq ınfraqurylymdy damytýǵa, esepteý qýattaryn keńeıtýge jáne Qazaqstanda jasandy ıntellekt tehnologııalary men bultty qyzmetterdi jedel engizý úshin qolaıly jaǵdaı jasaýǵa baǵyttalǵan.

Sondaı-aq «Qazaqtelekom» AQ, «Qazaq tili» halyqaralyq qoǵamdyq birlestigi jáne FireBird AI KZ LTD jasandy ıntellekt tehnologııalary salasynda qazaq tilin damytýǵa baǵyttalǵan yntymaqtastyq memorandýmyna qol qoıdy. Onyń negizgi maqsaty — JI salasynda qazaq tilin damytý jáne ilgeriletý, sondaı-aq birlesken tehnologııalyq bastamalardy zerdelep, ómirge asyrý.

Alatau City Authority qarjy jáne tehnologııalyq kompanııalarmen memorandýmdar jasasty

Alatau City Authority arnaıy basqarý uıymy «Qazaqstan qor bırjasy» AQ, «Hýaveı Teknolodjız Kazahstan» JShS, Bybit Limited / Bybit Kazakhstan, Binance Kazakhstan jáne «Qazaqstan Damý banki» AQ-men jekelegen yntymaqtastyq memorandýmdaryna qol qoıdy.

Alatau City Authority — Qazaqstan Respýblıkasynyń «Alataý qalasynyń erekshe quqyqtyq rejımi týraly» Konstıtýtsııalyq zańyna sáıkes qurylǵan jáne memlekettik saıasattyń iske asyrylýyn, sondaı-aq qalanyń Eýrazııanyń zamanaýı ekonomıkalyq jáne ınvestıtsııalyq ortalyǵy retinde damýyn qamtamasyz etetin Alatau City qalasynyń arnaıy basqarý uıymy.

Kelisimder Alatau City aýmaǵynda tsıfrlyq qarjy tehnologııalary, ınnovatsııalar salasyndaǵy uzaq merzimdi áriptestikti damytýǵa jáne áleýetti tehnologııalyq jobalardy júzege asyrýǵa baǵyttalǵan.

Qazaqstan men Grýzııa tsıfrlyq úkimet salasyndaǵy yntymaqtastyqty keńeıtedi

«Ulttyq aqparattyq tehnologııalar» AQ pen Grýzııanyń Tsıfrlyq úkimet agenttigi aqparattyq-kommýnıkatsııalyq tehnologııalar salasyndaǵy ózara túsinistik týraly memorandýmǵa qol qoıdy.

Taraptar elektrondy úkimet jáne tsıfrlyq transformatsııa salasynda tájirıbe almasýǵa, birlesken jobalardy júzege asyrýǵa, sondaı-aq saraptamalyq jáne tehnıkalyq qoldaý kórsetýge ýaǵdalasty.

QazInnovations men Bashqurtstannyń ІT damytý qaýymdastyǵy yntymaqtastyqty nyǵaıtady

«QazInnovations» ulttyq ınnovatsııalardy damytý agenttigi» AQ pen Bashqurtstan Respýblıkasynyń Aqparattyq tehnologııalardy damytý qaýymdastyǵy ınnovatsııalar, tsıfrlandyrý, tehnologııalyq kásipkerlik jáne tehnologııalardy kommertsııalandyrý salalaryndaǵy yntymaqtastyq týraly kelisimge qol qoıdy.

Taraptar birlesken keńester men kezdesýler ótkizýdi, jumys toptaryn qurýdy, aqparat pen ozyq tájirıbe almasýdy, sondaı-aq Qazaqstan men Bashqurtstannyń ınnovatsııalyq ekojúıelerin damytý úshin birlesken is-sharalar josparlaryn ázirleýdi kózdep otyr.

DOMiNO Ventures pen Paidax ınvestıtsııalyq kelisim jasasty

Ózbekstandyq DOMiNO Ventures pen Paidax brokeri ózara túsinistik týraly memorandýmǵa qol qoıdy. Qujat taraptardyń ınvestıtsııalyq jáne tehnologııalyq salalardaǵy yntymaqtastyǵyn damytýǵa baǵyttalǵan.

Medhub Health AI Quality tsıfrlyq densaýlyq saqtaý salasynda kelisimder jasasty

Medhub Health AI Quality (HAQ) kommertsııalyq emes uıymy «NeuroGuard AI» JShS-men jáne densaýlyq saqtaý saıasaty men tsıfrlyq densaýlyq saqtaý salasyndaǵy táýelsiz sarapshy Mahmýd Ádilmen ózara túsinistik týraly memorandýmdarǵa qol qoıdy.

Kelisimder klınıkalyq zertteýler júrgizýge daıyn klınıkalyq ortalyqtardy qurý baǵytynda uzaq merzimdi seriktestikti damytýdy, medıtsınalyq derekter almasýdy retteýde halyqaralyq tájirıbeni tartýdy, sondaı-aq tsıfrlyq densaýlyq saqtaý saıasaty men basqarý júıesin damytýdy kózdeıdi.

AI & Digital Bridge 2026 forýmynda qol qoıylǵan qujattar jasandy ıntellekt, tsıfrlyq aktıvter jáne esepteý ınfraqurylymynan bastap bilim berý, tsıfrlyq densaýlyq saqtaý, halyqaralyq tehnologııalyq yntymaqtastyq jáne ınnovatsııalyq ekojúıelerdi damytýǵa deıingi keń aýqymdy baǵyttardy qamtıdy.

Bul kelisimder forýmnyń praktıkalyq mańyzyn aıqyn kórsetedi: jahandyq JI kún tártibin talqylaýmen qatar, onyń alańy jobalardy iske qosý, ınvestıtsııa tartý jáne memleket, bıznes, ýnıversıtetter, ınvestorlar men halyqaralyq tehnologııalyq kompanııalar arasynda seriktestik ornatý úshin paıdalanylady.

Forým týraly

AI & Digital Bridge 2026 forýmy Astanada 1–3 qazan aralyǵynda ótip jatyr jáne AI MONTH aýqymdy bastamasynyń basty halyqaralyq oqıǵasy. Bul alań jahandyq tehnologııalyq ındýstrııa, memlekettik organdar, bıznes, ǵylymı qoǵamdastyq, ınvestorlar men startaptar ókilderin jasandy ıntellekt pen tsıfrlyq ekonomıkany órkendetý isinde biriktiredi.

AI & Digital Bridge 2026 uıymdastyrýshylary — Qazaqstan Respýblıkasynyń Jasandy ıntellekt jáne tsıfrlyq damý mınıstrligi, Astana Hub halyqaralyq ınnovatsııalyq klasteri jáne Astana ákimdigi.

Eske salaıyq, munyń aldynda AI & Digital Bridge 2026 halyqaralyq forýmy aıasynda Memleket basshysy Qasym-Jomart Kemeluly Toqaevqa orta bilim berý júıesine jasandy ıntellektini engizý baǵytynda atqarylyp jatqan jumystar tanystyrylǵanyn habarlaǵan edik.