AI & Digital Bridge Awards 2026: jeti nomınatsııada kimder jeńiske jetti
ASTANA. KAZINFORM — Qazaqstan Respýblıkasynyń Premer-mınıstri Oljas Bektenov AI & Digital Bridge 2026 forýmynda usynylǵan tsıfrlyq sheshimdermen tanysyp, AI & Digital Bridge Awards 2026 jeńimpazdaryna marapattar tabystady.
Premer-mınıstrge túrli salada qoldanýǵa arnalǵan otandyq tehnologııalyq kompanııalar men uıymdardyń jasandy ıntellekt negizindegi ázirlemeleri tanystyryldy.
Forým aıasynda 60-tan astam jańa kelisimge qol jetkizildi. Premer-mınıstr tıimdiligi dáleldengen tehnologııalardy odan ári keńinen engizýdiń mańyzdy ekenin basa aıtty.
— Qazaqstan tsıfrlyq ınfraqurylymdy ozyq qarqynmen damytýda. Qazirgi tańda „Derekterdi óńdeý ortalyqtarynyń alqaby“ megajobasy belsendi júzege asyrylyp jatyr. Bul — Ortalyq Azııadaǵy energetıkalyq áleýeti 1 GVt-qa deıin jetetin eń iri kampýs. Derekterdi óńdeý ortalyqtary jasandy ıntellektini, bultty servısterdi, ǵylymı zertteýler men jańa tsıfrlyq óndiristerdi damytýǵa negiz bolady. Biz basqa da jahandyq tehnologııalyq kompanııalarmen yntymaqtastyq ornatýǵa ázirmiz, — dedi Oljas Bektenov.
Sonymen qatar forým aıasyndaǵy plenarlyq sessııada DREAM kompanııasynyń prezıdenti Sebastıan Kýrts, Freedom Holding Corp. kompanııasynyń bas atqarýshy dırektory Tımýr Týrlov, Crimson Education kompanııasynyń negizin qalaýshy Djeımı Bıton jáne Higgsfield AI kompanııasynyń bas dırektory Aleksandr Mashrabov sóz sóıledi.
Sessııa qorytyndysy boıynsha Premer-mınıstr jasandy ıntellektini damytýǵa jáne tsıfrlyq transformatsııaǵa úles qosqan tehnologııa salasynyń ókilderine marapattar tabystady.
AI & Digital Bridge Awards 2026 jeńimpazdary:
- GovTech Project of the Year — egov.GPT, tabıǵı tildegi suranystar arqyly memlekettik qyzmetter alýǵa múmkindik beretin jasandy ıntellekt platformasy;
- EdTech Project of the Year — GoPrep, IELTS emtıhanyna daıyndalýǵa arnalǵan jasandy ıntellekt platformasy;
- Startup of the Year — HealthTech, medıtsınalyq qujattardy avtomattandyrý jáne tekserý jobasy;
- Corporate AI Transformation of the Year — Aventa AI, jumys úderisterin avtomattandyrýǵa arnalǵan korporatıvtik GenAI platformasy;
- International Breakthrough of the Year — Higgsfield AI, jasandy ıntellekt kómegimen beıne jasaýǵa jáne óńdeýge arnalǵan platforma;
- Venture Fund of the Year — MA7 Ventures, jahandyq áleýeti bar tehnologııalyq startaptarǵa $150 myńnan $1 mln-ǵa deıin ınvestıtsııa salatyn venchýrlik qor;
- Best Creative Industry Project of the Year — ōzen, mýzykany tsıfrlyq platformalarǵa taratýǵa jáne avtorlyq quqyq ıelerine tıesili syıaqyny basqarýǵa arnalǵan tsıfrlyq platforma.
Eske salaıyq, munyń aldynda AI & Digital Bridge forýmynda qandaı kelisimder men memorandýmdarǵa qol qoıylǵany týraly jazǵanbyz.
