AI boıynsha Apple-men yntymaqtasqannan keıin Alibaba aktsııalarynyń baǵasy 7,8%-ǵa kóterildi

ASTANA. KAZINFORM — Wall Street Journal basylymynyń habarlaýynsha, Qytaıdyń áıgili halyqaralyq kompanııasy Alibaba Group Holding Ltd. úshinshi toqsandaǵy qarjylyq esebin jarııalaǵaly jatyr.

Sonymen birge kompanııa jasandy ıntellekttiń damýy týraly jańa aqparatty jarııalady. Budan bólek Apple Qytaı naryǵynda iPhone telefondary úshin jasandy ıntellekt (Apple Intelligence) fýnktsııalaryn iske qosý úshin seriktes retinde Alibaba-ny tańdaǵany belgili boldy. 

Osy jaǵymdy jańalyqtardyń áserinen Alibaba aktsııalarynyń baǵasy (OTC: BABAF) seısenbide Gonkong qor bırjasynda kúndizgi saýdada bir aktsııa úshin 7,8%-ǵa kóterilip, 113,10 honkong dollaryna (14,52 AQSh dollary) jetti. 

Bul kórsetkish ótken jyldyń qyrkúıeginen beri kompanııanyń aktsııalary baǵamyndaǵy eń úlken bir kúndik tabys boldy. 

Aıta ketý kerek, Alibaba jaqynda ǵana «Qwen2.5-VL» dep atalatyn ozyq AI modelder serııasyn shyǵardy.

«Qwen2.5-VL» faıldardy taldaý, beıne taldaý, keskinderdegi nysandardy sanaý jáne kompıýterlerdi basqarý sııaqty kúrdeli operatsııalardy oryndaýǵa qabiletti.

Sonymen qatar, «Qwen2.5-VL» ártúrli synaqtarda OpenAI GPT-4, Anthropic’s Claude 3.5 Sonnet jáne Google Gemini 2.0 Flash sııaqty básekelesterinen jaqsy nátıje kórsetti. 

Sheteldik BAQ-tyń habarlaýynsha, Apple kompanııasy Alibaba-men jasandy ıntellekt fýnktsııalaryn ázirleýdi aıaqtap, daıyn ónimdi Qytaıdyń ınternet retteýshi organdaryna tapsyrǵan. 

Sheteldik BAQ sondaı-aq Apple men Alibaba túsinikteme suraýlaryna birden jaýap bermegenin aıtty. 

Sondaı-aq BAQ Morgan Stanley sarapshylaryna silteme jasaı otyryp, Alibaba-men yntymaqtastyq Apple-diń Qytaıdaǵy básekege qabiletti pozıtsııasyn jaqsartý úshin mańyzdy sheshim bolady jáne Qytaıda iPhone satylymynyń tómendeýi problemasyn jaqsartady.

Osyǵan deıin 2020-2022 jyldary Alibaba platformasyna 220 kompanııa ornalastyrylǵany belgili boldy.