AI-95 jáne AI-98 benzıniniń sapasyna shaǵym kóbeıdi: mınıstrlik tekserýdi bastady
ASTANA. KAZINFORM – AI-95 jáne AI-98 benzıniniń sapasyna qatysty tekserý bastaldy. Bul týraly Energetıka mınıstri Erlan Aqkenjenov málim etti.
Búgin Úkimet otyrysynan keıingi baspasóz máslıhatynda áleýmettik jelide Astanadaǵy júrgizýshiler AI-95 jáne AI-98 benzıniniń sapasyna qatysty shaǵymdanǵany jaıynda saýal boldy.
- Shynynda da, bul taqyryp qazir áleýmettik jelide qyzý talqylanyp jatyr. Árıne, mınıstr retinde bul máseleden habardarmyz. Keshe meniń orynbasarym - vıtse-mınıstr Qaıyrhan Tutqyshbaev Pavlodar qalasyna jiberildi. Qazir olar Pavlodar zaýytynda otyn sapasyn tekserip jatyr, - dedi Erlan Aqkenjenov.
Onyń aıtýynsha, qazir mınıstrlik bul máseleni baqylaýda ustap otyr.
- Birneshe kún kútý qajet, ıaǵnı janarmaıdyń jańa partııasy jetkiziledi. Atap aıtqanda, Atyraý munaı óńdeý zaýytynan janar-jaǵarmaı bolady. Sondyqtan óte qysqa merzim ishinde tıisti sapany qamtamasyz etemiz, - dedi mınıstr.
Onyń sózine qaraǵanda, qazir bul másele boıynsha janar-jaǵarmaı quıý stantsııalary jaýapkershilikti munaı óńdeý zaýatyna ysyryp jatyr. Óz kezeginde zaýyt buǵan janar-jaǵarmaı quıý stantsııalary jaýapty ekenin aıtyp otyr.
- Taıaý arada osy jaǵdaıdy tolyqtaı tekserip, jaýabyn beremiz, - dedi vedomstvo basshysy.
Buǵan deıin Energetıka mınıstri bıyl tórtinshi munaı óńdeý zaýyty boıynsha naqty sheshim bolatynyn málim etti.
