AI-95 benzınin eldiń túkpir-túkpirine jetkizý kestesi qaıta qaralýy múmkin

ASTANA. QazAqparat – «QazMunaıGaz» Basqarma tóraǵasynyń orynbasary Dmıtrıı Makeev munaı óńdeý zaýytynan janarmaı beketine AI-95 markaly benzındi jetkizý kestesi qaıta qaralýy múmkin ekenin aıtty, dep habarlaıdy QazAqparat tilshisi.

«Bul másele boıynsha Energetıka mınıstrligimen jáne Qazaqstan temir joly kompanııasymen ózara is-qımyl jasalyp jatyr. Eger ónimdi jetkizý úshin «jasyl dáliz» kerek bolsa, bul másele jedel pysyqtalady. Degenmen, elimizdiń túkpir-túkpirine benzın jetkizýge biraz ýaqyt kerek», - dedi D. Makeev elordada ótken baspasóz máslıhatynda.

Onyń aıtýynsha, qazir bul másele boıynsha tıisti usynystar pysyqtalyp jatyr.

«Ónimdi jetkizýde irkilis bolyp jatady. Bul turǵyda qandaı kemshilikter bar ekenine qarap, olardy túzetip jatyrmyz. Jalpy, aıtylyp jatqan syndy moıyndaımyz, jumys istep jatyrmyz», - dedi kompanııa ókili.

Dmıtrıı Makeev keıbir jaǵarmaı quıý beketterinde AI-95 benzıniniń jetispeýshiligi logıstıkaǵa baılanysty ekenin aıtty.

«Shynymen de keıbir janarmaı quıý beketterinde AI-95 benzıni jetpeı jatyr degen aqparat tarady. Bul másele logıstıkaǵa qatysty. Óıtkeni, janar-jaǵarmaıdy elimizdiń batysynan ońtústik óńirlerine jetkizý eki aptaǵa sozylýy múmkin. ıAǵnı benzın bar, biraq tıisti kólemi jolda kele jatyr. Elimizdiń aýmaǵy úlken ekenin eskersek, logıstıka biraz ýaqyt alady. Jalpy, biz tıisti tehnıkalyq is-sharalardy atqardyq, Atyraý munaı óńdeý zaýytyna óndiris boıynsha aýqymdy kólem júkteldi», - dedi kompanııa ókili.

Budan buryn habarlanǵandaı, Dmıtrıı Makeev Pavlodar jáne Shymkent munaı óńdeý zaýyttary qashan tolyq iske qosylatynyn aıtty.