AI-92 janarmaıynyń baǵasy bir jylda 15%-ǵa qymbattaǵan
40%-dan astamyn ádettegideı, eń qýatty munaı óńdeý zaýyty ornalasqan Pavlodar oblysy qamtamasyz etti, Pavlodar munaı-hımııa zaýyty - 372,9 myń tonna + jylyna 25,9%. Qazirgi ýaqytta PMHZ-da kúkirt óndirý qondyrǵylarynyń kesheninde iske qosý men jóndeý jumystary júrip jatyr, bul jumystar shilde aıynda, al ızomeratsııa men nafta splıtteri qondyrǵysyndaǵy jumystar - qyrkúıek aıynda aıaqtalady. Bul ýaqytqa deıin kásiporyn kepildikti paıdalaný kórsetkishterine qol jetkizip, K4 (Eýro-4 balamasy) ekologııalyq synybynyń joǵary oktandy avtomobıl benzınderin óndirýi tıis. Jańartý jumystary aıaqtalǵan soń, joǵaryoktandy benzın óndirý 297 myń tonnaǵa artady.
PetroQazaqstan Oıl Prodakts (PQOP) ornalasqan Ońtústik Qazaqstan oblysy 233,6 myń tonna - ótken jylǵy kezeńmen salystyrǵanda 4,6%-ǵa azyraq janarmaı óndirdi. Kórsetkishtiń tómendeýi 2017 jyldyń 27 sáýirinde aıaqtalǵan zaýyttaǵy josparly kúrdeli jóndeýmen baılanysty. 2017 jyldyń 31 naýryzynda PQOP shıkizatty aldyn ala gıdrotazalaý blogy bar jeńil benzın fraktsııalarynyń ızomeratsııasy qondyrǵysyndaǵy qurylys-montaj jumystarynyń mehanıkalyq aıaqtalýy boıynsha aktilerge qol qoıyldy.
2017 jyldyń shilde aıyna deıin nysanda iske qosý jáne jóndeý jumystary júrgiziledi jáne K4, K5 ekologııalyq klassyndaǵy joǵary oktandy benzınderin alýǵa jáne olardyń óndirisin jylyna 460 myń tonnaǵa deıin ulǵaıtýǵa múmkindik beretin ızomeratsııa qondyrǵysy iske qosylady. Odan bólek, zaýyt qýattylyǵyn jylyna 5,25 mıllıon tonnadan 6 mıllıon tonnaǵa deıin arttyrýǵa baǵyttalǵan jańǵyrtý jumystarynyń ekinshi kezeńi boıynsha jumystar júrgizilýde.
Elimizdiń úshinshi iri munaı óńdeý zaýyty ornalasqan Atyraý oblysynda 190,3 myń tonna - ótken jylǵy kórsetkishten 40,4%-ǵa az otyn óndirilgen. Zaýytta munaıdy tereńdetip óńdeý kesheni salynyp jatyr, joba qurylysy aıaqtalýǵa jaqyn. Munaıdy tereńdetip óńdeý kesheni qurylysynyń mehanıkalyq aıaqtalýy bıylǵy jyldyń ortasyna josparlanǵan, odan keıin iske qosý jáne jóndeý jumystary bastalady.
2015 jyly óndiristik kólemder tómendegen soń (jylyna mınýs 5,1%), 2016 jyly qazaqstandyq munaı óńdeý zaýyttary qarqyndy jumys istedi (burynǵy qarqynyna jetti) - ótken jyl 2,8%-ǵa, 2,95 mln tonnaǵa deıingi ósimmen aıaqtalady.
Qazaqstandyq óndirýshiler benzınge degen suranystyń 70%-dan astamyn (2017 jyldyń qańtar-aqpan aılary boıynsha - 70,4%) qamtamasyz etip otyr. Óndiristiń ósimimen qatar ımporttyń da ósimi baıqalǵan - eki aıdyń qorytyndysy boıynsha 60,3%-ǵa, 237,1 myń tonnaǵa deıin ósken.
«Munaı óńdeý zaýyttaryn jańǵyrtqan soń, munaı óńdeý kólemi 14,5 mıllıon tonnadan 17,5 mıllıon tonnaǵa deıin artady. Aqshyl munaı ónimderi - benzın, dızeldik otyn, avıaotynynyń óndirisi ulǵaıady. Osylaısha, 2019 jyldan keıin elimizdiń ishki qajettilikterin otandyq munaı ónimderimen tolyq qamtamasyz etýdi jáne janar-jaǵarmaıdyń ımportqa táýeldiligin boldyrmaýdy kútýdemiz», - dep málimdedi QR Energetıka mınıstri Qanat Bozymbaev.
2017 jyldyń sáýir aıynyń qorytyndysyna sáıkes, QR boıynsha AI-92 markaly benzın baǵasy 2016 jyldyń sáýir aıymen salystyrǵanda shamamen 14,8%-ǵa, lıtrine 142,1 teńgege deıin qymbattaǵan. Degenmen, naýryz aıymen salystyrǵanda baǵa azdap tómendegen (0,1%). Energetıka mınıstri Qanat Bozymbaev «QazMunaıGaz» janarmaı quıý beketterindegi AI-92 benzıniniń arzandaýyna qatysty pikir bildirip, bul markadaǵy benzınniń 142 teńgege deıin arzandaǵanyn málimdedi. «Naryqta taýar satylmaı turyp qaldy jáne suranys tómendedi», - dedi ol.
Teńgeniń dollarǵa shaqqandaǵy nyǵaıýy da Reseıden ımporttalatyn otynnyń arzandaýyna yqpal etti. Odan bólek, Qazaqstandaǵy AI-92 qorynyń deńgeıi naryqtaǵy kóterme baǵa deńgeıiniń rettelýine septigin tıgizdi.
Ózgelerden qymbatyraq AI-95/96 markalary bir jylda 11,8%-ǵa, aı saıyn 0,1%-ǵa qymbattap, sáýir aıynyń qorytyndysy boıynsha lıtrine 154,9 teńgeni quraǵan. AI-98 bir jylda 6%-ǵa, lıtrine 164,3 teńgege deıin kóterildi.
Dızeldik qozǵaltqyshtary bar avtomobıl ıelerine baǵalardyń ósýi aıtarlyqtaı sezildi: jazǵy dızel birden 34,8%-ǵa, lıtrine 132,7 teńgege qymbattasa, qysqy dızel bir jylda - 12,7%-ǵa, lıtrine 171,2 teńgege deıin kóterildi. Tek qana sáýir aıynda naýryz aıymen salystyrǵanda jazǵy dızel otyny taǵy 0,8%-ǵa, qysqy dızel otyny - 0,5%-ǵa qymbattady.
