AI-92 markaly benzınin zańsyz shyǵaryp, Qyrǵyzstanǵa eksporttaǵandarǵa izdeý jarııalandy
ASTANA. KAZINFORM – Qarjylyq monıtorıng agenttigi qylmystyq toptyń qyzmetin áshkereledi.
Olar AI-92 markaly benzınin Qyrǵyz Respýblıkasyna zańsyz shyǵaryp, satyp otyrǵan. Tergeý barysynda kúdiktilerdiń Qazaqstan aýmaǵynda benzındi eritkish jáne dıstıllıat retinde rásimdep, jalǵan qujattar arqyly shekaradan zańsyz ótkizgeni anyqtaldy.
Jedel izdestirý is-sharalary barysynda «Túrksib» stantsııasynda zańsyz jolmen jóneltilgen 500 tonnaǵa jýyq benzın tıelgen 8 temirjol tsısternasy ustaldy. Júk «Qara Maı Oıl» shaǵyn munaı óńdeý zaýytynan jóneltilgen jáne Qyrǵyzstanǵa baǵyttalǵan.
Tergeý málimetterine sáıkes, 2023-2024 jyldary atalǵan shaǵyn zaýyttan 102 myń tonnadan astam munaı ónimderi kórshi memleketke eksporttalǵan. Aldyn ala esep boıynsha, qylmystyq toptyń kóleńkeli aınalymy sońǵy eki jylda 15,5 mlrd teńgeden asyp tústi.
Atalǵan is boıynsha úsh kúdiktige memleketaralyq izdeý jarııalandy: Popov Alekseı Aleksandrovıch, 27.04.1987 jyly týǵan. Qazaqstan Respýblıkasynyń azamaty, Jambyl oblysy, Taraz qalasynyń týmasy, buryn sottalmaǵan;
Ibraımov Rahymjan Mamatuly, 29.01.1996 jyly týǵan, Qazaqstan Respýblıkasynyń azamaty, Ózbekstan Respýblıkasynyń Chartak qalasynyń týmasy, buryn sottalmaǵan;
Saǵyndyqov Serik Erlanuly, 29.07.1987 jyly týǵan, Qazaqstan Respýblıkasynyń azamaty, Jambyl oblysynyń týmasy, buryn sottalmaǵan;
Olarǵa «kamaqqa alý» túrindegi bultartpaý sharasy tańdaldy.
- Eger sizge izdestirilip jatqan tulǵalardyń ornalasqan jeri týraly qandaı da bir aqparat belgili bolsa, kelesi telefondarǵa habarlasýdy suraımyz: +7-727-279-20-86 – kezekshi bólim. Syıaqy men anonımdilikke kepildik beriledi, - delingen habarlamada.
Buǵan deıin mınıstr benzın baǵasyn naryq retteıtinin aıtqan edi.