Aı - 92, Aı-93 markaly benzınniń shekti baǵasy 102 teńge kóleminde qalady
ANA. 11 shilde. QazAqparat /Rýslan Ǵabbasov/ - Aı - 92, Aı-93 markaly benzınniń shekti baǵasy 102 teńge kóleminde qalady. Bul týraly búgin Úkimet otyrysynan keıingi brıfıngte Munaı jáne gaz mınıstri Saýat Myńbaev málim etti.
Onyń sózine qaraǵanda, jaqyn arada Májilis qabyldaǵan janar-jaǵarmaıdy retteý máselesi jónindegi qabyldanǵan zańǵa qol qoıylǵannan keıin bul másele tez arada sheshilmek. Atap aıtqanda, búginde janarmaı baǵasy "Gelıos" kompanııasynyń janarmaı quıý stansalarynda ǵana ósip otyr. «Aıta keteıik, janar-jaǵarmaıdy retteý máselesi jónindegi zań qabyldanǵan bolatyn. Sol zań boıynsha jaǵarmaıdyń shekti baǵasy anyqtalady. Eger de, sol shekti baǵadan ósetin bolsa, oǵan biz tıisti shara qoldanatyn bolamyz»,-dedi mınıstr.
«Aı - 92, 93 markaly benzın úshin shekti baǵa qazirgi kezdegi 102 teńge kóleminde qalatyn bolady. Tek qana "Gelıos" kompanııasy benzın baǵasyn kóterdi. Alaıda bul másele boıynsha tıisti shara qoldanylady»,-dep atap ótti S. Myńbaev.
