AI-82 markaly benzınniń qymbattaýy qandaı taýarlardyń baǵasyna áser etedi

ASTANA. QazAqparat – Premer-Mınıstrdiń orynbasary - Saýda jáne ıntegartsııa mınıstri Serik Jumanǵarın Úkimet kýlýarynda AI-82 markaly benzınniń qymbattaýy qandaı taýarlardyń baǵasyna áser etetinin aıtty, dep habarlaıdy QazAqparat tilshisi.

«Bıylǵy jazda áleýmettik mańyzy bar taýarlardyń tapshylyǵy bolmaı ma?» - dep surady jýrnalıst.

Mınıstr oǵan negiz joq ekenin alǵa tartty.

«Tapshylyq bolmaıdy dep esepteımin. Qazir bizdiń saqtandyrý qorlaryndaǵy taýarlardyń kólemi jetkilikti. Іshinde kartop ta, sábiz de, qyryqqabat ta bar. Sol sebepten, eshqandaı problema joq dep esepteımin. Sońǵy bes aptada baǵanyń ósýi 0,3 paıyz boldy. 4 sáýirge deıingi málimet boıynsha keıingi aptada baǵanyń ósýi – 0 paıyz. Ótken aptada aıtqanymdaı, benzın baǵasynyń azyq-túlikke áseri sonshalyqty kóp emes – 2 paıyzdan 5 paıyzǵa deıin. Al basqa, azyq-túlikke jatpaıtyn taýarlardyń, qyzmetterdiń baǵasyna áser esepteýi kerek. Mýltıplıkatıvti áser bolady, árıne. Sebebi, basqa taýarlarǵa, basqa qyzmetterge onyń áser etýi óte erekshe», - dedi mınıstr.

Vedomstvo basshysy dıqandarǵa dızel bekitilgen baǵamen satylyp jatqandyqtan, astyq jınaý naýqany qalypty ótedi degen paıym aıtty.

«Dızel otynyn arzan baǵamen, 1 lıtrin 204 teńgeden berdik. Ol baǵa ózgermeıdi. Sol sebepten, bul astyq jınaý naýqanyna eshqandaı áser etpeıdi. Bizdiń óz josparymyz bar. Ony oryndap jatyrmyz. Saqtandyrý qorlarynda taýarlar jetkilikti, óndirýshilerge sýbsıdııa berip jatyrmyz. Sol sebepten, «erteń tapshylyq bolady, baǵanyń joǵary ósimi bolady» dep áńgime qozǵaý, meniń oıymsha, qazir qajet emes», - dedi vıtse-premer.