«AI-80 benzıni men dızel otyny qymbattaı ma?» - baspasózge sholý
***
Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń músheleri Energetıka mınıstrligi men «Samuryq-Qazyna» AQ-tyń basshylyǵymen kezdesip, elimizdegi munaı ónimderiniń baǵasyn retteý men sapasyn arttyrýdyń zańnamalyq máselelerin talqylady. Bul jaıynda «Egemen Qazaqstan» gazetiniń senbilik sanyndaǵy «AI-80 benzıni men dızel otyny qymbattaı ma?» degen taqyryptaǵy maqalada aıtylǵan. Basylymnyń jazýynsha, Energetıka mınıstriniń orynbasary Áset Maǵaýov ishki naryqtaǵy munaı ónimderiniń turaqtylyǵyn saqtaýǵa arnalyp qabyldanǵan sharalar týraly habarlady. Munaı ónimderiniń tapshylyǵy qaýpin boldyrmaý maqsatynda mınıstrlik AI-80 jáne dızel otynyna baǵalardy memlekettik retteýdi toqtatýdy usynyp otyr. Baıandamashynyń aıtýynsha, janarmaı quıý beketterindegi tómen baǵalar kórshi memlekettermen shekaralas aımaqtarǵa munaı ónimderiniń baqylaýsyz aǵylýyna ákelip soǵýy múmkin. «Ekonomıkalyq saıasat, ınnovatsııalyq damý jáne kásipkerlik komıtetiniń tóraǵasy Talǵatbek Abaıdildın AI-80 markaly benzın men dızel otyny baǵasynyń kóterilýi, ásirese, aýyl turǵyndary úshin áleýmettik mańyzy zor másele ekenine nazar aýdardy. Ol, sondaı-aq, gazdy paıdalanatyn kólik quraldarynyń úlesi ulǵaıyp otyrǵanyn esepke ala otyryp, onyń baǵasyna baqylaýdyń qajettigin atap ótti», - dep jazady basylym.
Internet-televızııa bizdiń órkenıetti ókshelep-aq keledi. Búgingi ınternettiń isine, ıaǵnı ne kórip, neni satyp alatynymyzǵa endi onlaın-TV (sandyq televızııa) tikeleı áser etetin bolady. Mýltekrandyq tehnologııanyń ornyna alýan túrli ıilgish smartfondar men smartbýkter keledi, al odan sál keıin golografıkalyq kórinisterdiń dáýiri saltanat qurmaq. Sarapshylar damyǵan elder onlaın TV-ǵa bizdiń ǵasyrymyzdyń ekinshi onjyldyǵynda túgel kóshedi degen boljam aıtady. Bul degenińiz jańa tehnologııa qazirgi jerseriktik, efırlik jáne kabeldi televızııaǵa qarsy tegeýrindi básekeles bolady degen sóz. «Egemen Qazaqstan» gazet elimizde ınternet-televızııany tuńǵysh quryp, búgingi kúnde jemisti jumys istep jatqan qaraǵandylyq jýrnalıst Botagóz Omarovany áńgimege tartqandaǵy maqsaty da BAQ salasyndaǵy osy jańalyqtardyń jaı-japsaryna qanyǵa túsýden týyndaǵan. Basylym tilshisi saýaldaryna tuşymdy jaýap bergen ol «Biz dástúrli BAQ-tarǵa básekeles emespiz, biz ınternette jumys isteımiz. Bizdiń jańalyqtardy kóptegen adamdar ózara bólisip júr, materıaldarymyzdy basqa BAQ-tar da paıdalana bastady. Munyń ózi biz úshin kórsetkish. Sonan soń, biz sońǵy kezderi qazaqstandyqtardyń jaǵymdy jańalyqtardy saǵyna bastaǵanyn baıqadyq. Mysaly, bizdiń jýyrda jasaǵan dárigerler týraly habarymyzdyń kórsetilimi kún saıyn artyp keledi. Bizdiń bolashaqtaǵy maqsatymyz senimdi seriktester taýyp, Qazaqstan boıynsha tilshilik torap qurý. Kásibı qural-jabdyqtar alyp, shtatty kóbeıtýdi armandaımyz», - deıdi. Suhbat «Internet-televızııa bolashaqtyń ıgiligi» degen taqyryppen berilgen.
***
«Shymkent polıtsııasy bank kartochkalarmen alaıaqtyq jasaǵan degen kúdikke ilingen azamatty izdestirip jatyr. Áńgime kánigi alaıaq jaıynda bolyp turǵany polıtsııaǵa birinen soń biri oblystyń ondaǵan turyny kelip shaǵymdanǵannan keıin túsinikti boldy», - dep jazady «Kazahstanskaıa pravda» gazeti.
Olardyń barlyǵy da belgisiz azamattyń bankomattan aqsha alyp berýge kómektesem degen jeleýmen olardyń bank kartochkalaryn aıyrbastap alǵan. Odan keıin adamdardyń esepshottarynan aqsha sheship alyp otyrǵan.
***
Sońǵy 10 jylda balalardyń, ásirese joǵary synyp oqýshylarynyń boıy ósip, názik bola túsken. Bul jaıynda «Ekspress K» gazetiniń senbilik sanynda jazylǵan. Maqalada jyl saıyn qazaqstandyq ata-analar Qyrǵyzstan men Qytaıda tigilgen mektep formasyn satyp alýǵa 5 mlrd. teńge shyǵyndaıtyndyndyǵy aıtylǵan. Degenmen, sheteldik básekelesti basyp ozýǵa qaýqarly kásiporyndar Qaraǵandy óńirinde de kóp. Kúni keshe Qaraǵandyda mektep formasyn tigetin jergilikti óndirýshilerdiń arnaıy kórmesi ótken. Olardyń barlyǵy da shamamen 5-8 myń teńgege oýshy formasyn tolyq jıyntyǵyn óte joǵary sapada tigip berýge daıyn.
