AI-80 benzıni baǵasyn retteýden bas tartý qajet - QR Energetıka mınıstrligi
Vıtse-mınıstr AI-80 markaly benzınniń shekti baǵasy lıtrine 89, al dızel otyny 99 teńgeni quraıtyndyǵyn atap ótti. Al bul janarmaılardyń Reseıdegi baǵasy sáıkesinshe 171 jáne 177 teńgeni, Qyrǵyzstanda 146 jáne 151 teńgeni qurap otyr. Sebebi bul memleketterdi AI-80 men dızel otynynyń baǵasy memleket tarapynan rettelmeıdi.
«Ótken jyly biz AI-90 benzıniniń baǵasyn retteýden bas tartý týraly sheshim qabyldaǵan edik. Esterińizde bolsa, bastapqy ýaqytta baǵa sharyqtap ketti. Baǵa 134-140 teńgege deıin jetti. Degenmen, odan keıin naryqta teńgerim deńgeıdi bir qalypqa túsirdi. Qazirgi ýaqytta Qazaqstan boıynsha baǵa shamamen 125 teńge. Baǵa óz teńgerimin tapty. Bul da qordyń saqtalýyna óz septigin tıgizdi», - dedi Á.Maǵaýov.
Osy rette ol qazirgi ýaqytta Energetıka mınıstrligi Ulttyq ekonomıka mınıstrligimen birlesip, AI-80 benzıni men dızel otynynyń baǵasyn retteýden bas tartý máselesin talqylap jatqandyǵyn atap ótti.
«Degenmen, eshqandaı sheshim qabyldanǵan joq jáne menińshe ol taıaý bolashaqtyń enshisinde. Qazaqstan boıynsha bul benzınge suranys óte joǵary. Al dızel otynynda Reseımen úlken aırymashylyq bar. Bul Reseımen shekaralas oblystarda jaǵdaıdy qıyndatady. Bizdiń janarmaı quıý stansalarynda dızel 99 teńge bolsa, kórshiles Reseıde 176 teńge. Sondyqtan da avtomobılder qazaqstandyq jaqta janarmaı quıýǵa tyrysady. Al bul soltústik óńirlerdegi dızel otynyn tutyný kóleminiń joǵary bolýyna ákelip otyr», - dedi Á.Maǵaýov.
