«Ahýaldy beıbit retteýge baǵyttalǵan barlyq sharalar qoldaýǵa laıyq» - baspasózge sholý
***
«Egemen Qazaqstan» gazetiniń jazýynsha, keshe Memleket basshysy Nursultan Nazarbaev jumys saparymen Ýkraına astanasy - Kıevte boldy. Qazaqstan Prezıdenti jumys sapary barysynda Ýkraına Prezıdenti Petr Poroshenkomen kezdesti. Kezdesý barysynda memleket basshylary ekijaqty saýda-ekonomıkalyq yntymaqtastyqtyń negizgi baǵyttaryn, sondaı-aq, halyqaralyq kún tártibindegi ózekti máselelerdi talqylady. Sonymen qatar, Ýkraınadaǵy ahýaldy, ony barlyq múddeli taraptardyń qatysýy arqyly retteý joldaryn qarastyrdy.
Qazaqstan basshysy Ýkraına tóńiregindegi ahýaldy beıbit retteýge baǵyttalǵan barlyq sharalardy qoldaıtynyn aıtty. Qazirgi jaǵdaı eshkimge paıda bermeıdi. Barlyq eldermen dostyq qatynasta ekenimizdi eskere otyryp, biz osy másele jóninde sizben birlesip jumys isteı alamyz. Biz belgili bir sheshimge kelip, adamdardyń opat bolýyn toqtatýǵa septigin tıgizetin sharalar qabyldaý úshin is-qımyldarymyzdy úılestire alamyz dep úmittenemin, dedi Qazaqstan Prezıdenti. Bul jaıynda «Ahýaldy beıbit retteýge baǵyttalǵan barlyq sharalar qoldaýǵa laıyq» atty maqaladan oqı alasyzdar.
Bas basylymda «Qazaqstannyń damý banki» (QDB) AQ basqarmasynyń tóraǵasy Bolat Jámishevpen aradaǵy suhbat basyldy.
«Aǵymdaǵy jyldyń 1 qarashasyna qaraǵandaǵy jaǵdaı boıynsha QDB ákimshiligi men qarjylandyrýynda jalpy, qaryz somasy 1 trln. teńgeden astam otyz bir ınvestıtsııalyq joba men úsh eksporttyq operatsııalar bar. On aıdyń ishinde Damý banki («BRK-Lızıng» enshiles kompanııasyn qosa eseptegende) jalpy somasy 162 mlrd. teńgeden astam on bir ınvestıtsııalyq jobany, lızıngtik mámilelerdi jáne eksporttyq operatsııalardy qarjylandyrý týraly sheshim qabyldandy. Onyń ishinde, úsh joba ınfraqurylym salasymen jáne segizi - óńdeý ónerkásibimen usynylǵan. Eger naqtyraq aıtatyn bolsaq, bul iri ınfraqurylymdyq jobalar - Ońtústik Qazaqstan oblysynyń gaz taratý júıesin jetildirý, temirjol jelisi boıymen apparattyq-baǵdarlamalyq keshen qurylysyn salý, baılanys platformasyn ornatý («Transtelekom» AQ), Aqtóbe oblysyndaǵy ferrohrom joǵary kómir qyshqyldy óndiristi keńeıtý («Kazhrom»), «SaryarqaAvtoPromda» avtomobıl qurastyrý», - dedi basqarma tóraǵasy. Bul suhbat « Bolat JÁMІShEV: «Jaqsy bank - ol qaryz alýshylardyń talaptaryna sáıkes keletin bank» degen taqyryppen berildi.
***
«Aıqyn» gazetiniń jazýynsha, Kárim Másimovtiń tóraǵalyǵymen ótken otyrysynda el Úkimeti bıylǵy jyldyń aldyn ala áleýmettik-ekonomıkalyq qorytyndylaryn shyǵardy.
Jarııa bolǵan resmı statıstıkaǵa sensek, jyl basynan beri ınflıatsııa 6,9 paıyzdy qurady. Bul byltyrǵy jylǵydan 2,8 paıyzǵa kóp. Bul rette aǵymdaǵy jyly azyq-túlik 6,9 paıyzǵa, al azyq-túliktik emes taýarlar - 7,8 paıyzǵa qymbattapty. Aqyly qyzmetter quny da 6,1 paıyzǵa kóterilgen. - Negizgi kapıtalǵa salynǵan ınvestıtsııalardyń ósýi baıqalady, biraq bul rette taý-ken óndirý jáne óńdeý ónerkásibi salalaryndaǵy ınvestıtsııalyq belsendiliktiń tómendigi kesirinen, ınvestıtsııalardyń ósý qarqyny baıaýlady jáne 4,1 paıyzdy qurady. Byltyrǵy jyly dál osy ýaqytta - 8,7 paıyz bolǵan edi, - dep málim etti Úkimet otyrysynan soń, Prezıdent janyndaǵy Ortalyq kommýnıkatsııalar qyzmetindegi brıfıngte, Ulttyq ekonomıka mınıstriniń orynbasary Mádına Ábilqasymova. Bul týraly «Úkimet táýeldilikti tómendetedi» atty maqaladan tolyq oqyp shyǵýǵa bolady.
Osy basylymda «Adaldyǵymnyń arqasynda aman júrmin» degen taqyryppen Májilis depýtaty Omarhan Óksikbaevpen aradaǵy suhbat jarııalandy.
«Bul másele qoǵamda kópten beri qozǵalyp keledi. Endi ony úkimettik deńgeıde sheshýdiń alǵashqy qadamy jasala bastaǵany - jaqsylyqtyń nyshany. Degenmen qatelikterge urynbas úshin bul jerde tereń zertteý qajet. Iá, qazirgideı almaǵaıyp sátterde soltústik aımaqtardy qazaqylandyrý - túpki maqsat. Biraq urandatyp atqaratyn is emes. Eger ulttyq tepe-teńdikti tıimdi etip, tigisin jatqyzyp ustamasaq, alpaýyttardyń astynda qalýymyz ábden múmkin ǵoı. Bizdiń jerimizde órtke ulasatyn ushqyndy shyǵarmas úshin, bárine de daıyn bolýdy ómirdiń ózi talap etip otyr. Árıne, ishki mıgratsııany júıeli túrde retteýimiz qajet. Qazir halyq jyly qonys, jaıly meken izdep, kóship jatady. Eger biz olardyń baǵytyn soltústikke qaraı burǵymyz kelse, mindetti túrde materıaldyq ıgilikpen qyzyǵatyndaı etip yntalandyrǵanymyz durys. Qarańyz, keńestik kezeńniń ózinde árbir aımaqtyń qıynshylyǵyna oraı jalaqy tólenetin. Óıtkeni soltústik pen ońtústikte eńbek etý, kúsh-qaırat jumsaý, shyǵyn shyǵarý birdeı emes qoı. Bolsa da sýyq óńirlerde qıynǵa, ári kóp shyǵynǵa túsedi»,-deıdi depýtat.
***
«Ana tili» gazetiniń sońǵy sanynda «Tilshiniń tirligin kim oılaıdy? ..» degen maqala berilgen. «Jýrnalıst qaýymyn halyqtyń «kózi,« qulaǵy», tipti« úni» desek jańsaqtyq bolmas. Alaıda osy el men bılikti baılanystyrýshy tilshiler qaýymyn baspanamen qamtamasyz etý máselesi áli kúnge deıin sheshimin tappaı keledi. Buǵan Qasym-Jomart Toqaevtyń tóraǵalyǵymen ótken Joǵarǵy palatanyń otyrysynda «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasyn talqylaý barysynda da kóz jetti», - dep jazady maqala avtory. Adamgershilik, el múddesi turǵysynan oılap qarasaq, dárigerler men ustazdar sııaqty jýrnalıster qandaı nysanda, meıli jekemenshik nysanynda bolsyn mamandyǵymen qyzmet etip júrse, memleket olardy turǵyn úımen qamtamasyz etýge tıis ekenin uǵyný qıyn emes.
«Al qazir, ásirese qazaq jýrnalısteri úshin baspanaly bolý ózekti máselege aınalyp otyr. Jalaqysy men qalamaqysy tamaǵy men kıiminen artylmaıtyny óz aldyna, keıbir áriptesterimiz aı saıyn páter jaldaǵany úshin biraz qarajatyn jumsaýy kerek. Qazaq tilindegi BAQ-tardyń qaltaly qojaıyndary bolmaıtynyn, tenderden ótkenderi mardymsyz jalaqymen ǵana kún kórerlikteı qarjylandyrylatynyn ańǵarý qıyn emes», - dep jazady basylym.
