Ahýal turaqtalyp keledi – Aqtóbe oblysynyń ákimi
«Memleket basshysy tótenshe jaǵdaı rejımin jarııalaǵannan keıin biz qajetti shara qabyldaýǵa tıis boldyq. Osyǵan baılanysty arnaıy operatsııa da júrgizildi. Sebebi jınalǵandar ákimdik ǵımaratyn talqandaı bastady. Qazir jaǵdaı turaqtalyp kele jatyr. Sharalar 19 qańtarǵa deıin jalǵasyn tabady. Jumysty kúni-túni toqtatpaı júrgizemiz. Ákimdik ǵımaratyna shyǵyn kólemin esepteý jumysy júrgizilip jatyr.
Birinshi ǵana emes, altynshy qabatqa da zalal keltirildi. Orgtehnıkanyń birazyn urlap ketken. Urlamaǵanyn syndyrǵan, búldirgen. Arasynda esik-tereze, jıhazdar da bar», - dedi oblys ákimi Ońdasyn Orazalın.
Oblys basshysy arańdatýshylyqqa ermeı, tártipsizdikterge qatyspaǵan oblys turǵyndaryna alǵys bildirdi.
«Ózimizdiń jerlesterimizdiń úlken mádenıettiliginiń arqasynda ákimdik ǵımaratynan ózge, dúken, saýda, demalys oryndary búlingen joq. Sonyń arqasynda olardyń jumys isteýine tolyq múmkindik bar. Azamattarymyzdyń basym kópshiligine rahmet aıtý kerek. Ashýǵa emes, aqylǵa salyp, bireýdiń aıtqanyna kónbeı, aıtaqtaǵanyna júrmeı, mádenıetin kórsetti», - dedi Ońdasyn Orazalın.
