Ahmetjan Esimov oqý ornynyń 50 jyldyǵymen quttyqtady
ALMATY. QazAqparat-Búgin Almaty qalasynyń ákimi Ahmetjan Esimov «Almaty memlekettik energetıka jáne elektrondy tehnologııalar kolledjine» kelip, oqytýshylyq quram men stýdentterdi oqý mekemesiniń 50-jyldyq mereıtoıymen quttyqtady, dep habarlady qalalyq ákimdiktiń baspasóz qyzmeti.
Sonymen qatar, qala basshysy jańa oqý jabdyqtarymen jáne kolledjdiń óndiristik korpýsymen tanysty. Munda Ahmetjan Esimovke dýaldy oqytý júıesiniń artyqshylyqtary pash etildi. Bul júıe kolledjge 2012 jyly engizilgen bolatyn.
Energetıka salasyna kadrlar daıarlaıtyn atalmysh oqý mekemesi Almaty qalalyq bilim basqarmasynyń tájirıbelik alańy bolyp tabylady. Munda búgingi tańda 100 adam jańa júıe arqyly 4 mamandyq boıynsha bilim alýda.
«Dýaldy júıe bıznestiń, memlekettiń jáne bolashaq mamannyń múddelerin biriktiredi. Oqytýshylar úshin bul - bilikti kadrlar daıarlaý, mamandardy izdeý men irikteýge baılanysty shyǵyndardy únemdeý. Jastar bul júıe arqyly sapaly bilim alady jáne ózderiniń bolashaqqa degen senimdiligi arta túsedi» - dedi óz sózinde Ahmetja Esimov.
