Ahmetjan Esimov batystaǵy gaz-hımııa kesheniniń qurylysyna oń baǵa berdi

NUR-SULTAN. QazAqparat - «Samuryq-Qazyna» ulttyq ál-aýqat qorynyń basqarma tóraǵasy Ahmetjan Esimov Mańǵystaý jáne Atyraý oblystaryna jumys saparymen bardy, dep habarlaıdy QazAqparat kompanııanyń baspasóz qyzmetine silteme jasaı otyryp.

Derekkózge súıensek, Esimov aldymen «Qashaǵan» ken ornynyń jumysymen tanysyp, qurylysy júrip jatqan polıpropılen zaýytyn jáne taǵy da basqa mańyzdy nysandardy aralap kórgen.

Sondaı-aq, jumys saparynda Ahmetjan Esimov Mańǵystaý oblysynyń ákimi Serikbaı Trumovpen kezdesip, Qordyń kompanııalar tobymen aradaǵy ózara yntymaqtastyq týraly keńes ótkizdi. Keńes barysynda eki tarap birlesken jobalardyń, sonyń ishinde qaıyrymdylyqqa qatysty jobalardyń damý máselelerin talqylady.

Aıta keterligi, Mańǵystaý oblysy bıýdjetiniń 38% astamyn qalyptastyryp otyrǵan Qordyń portfeldi kompanııalary.

«Samuryq-Qazyna» basshysy «Qashaǵan» ken ornyndaǵy teńiz kesheniniń D aralyn aralap, nysannyń qazirgi jaǵdaıynan habardar bolǵan. Aıta keteıik, keshendi jóndeýden ótken «Qashaǵannan» qazir kúnine 400 myń barrel munaı alynady.

Jalpy, 2018 jyly «Qashaǵannan» jylyna 11,3 mln tonna munaı alý josparlanǵan bolatyn. Alaıda bul jospar asyra oryndalyp, ken orny byltyr 13,2 mln tonna munaı óndirgen.

Ahmetjan Esimov sondaı-aq, «Kazakhstan Petrochemical Industries» atty gaz-hımııa kesheniniń qurylysyn aralady. «Samuryq-Qazyna» basshysy keshendegi menedjment aýysqannan keıingi qurylys barysyn oń baǵalady. Qazirgi tańda jobanyń júzege asyrylý jyldamdyǵy 34% quraıdy. Al, 2017 jyldyń 27 qarashasy men 2018 jyldyń 28 maýsymy aralyǵynda jobanyń júzege asyrylý jyldamdyǵy nebary 6% bolatyn.

«Qazir zaýyttyń bas jospary men tehnologııalyq syzbasy ázirlengen. Jospar boıynsha, joba qurylysy 2021 jyldyń ortasyna qaraı tolyq aıaqtalady», - dep habarlaıdy kompanııanyń baspasóz qyzmeti.