Ahmettiń jary Badrısafa musylman dinin qalaı qabyldady

NUR-SULTAN. QazAqparat – Ahmet Baıtursynuly men jary Badrısafa Muhamedsadyqqyzynyń kóńil jarastyryp, nekelesýi týraly ańyz ben áfsana kóp. Onyń birinde Alash ardaqtysynyń «jetim qyz» Aleksandraǵa jany ashyp úılengeni aıtylsa, taǵy bir ańyz ekeýiniń arasynda ińkár sezimniń ushqyny bolǵanyn meńzeıdi. Baıtursyn áýletimen birge Almatydaǵy mýzeı-úıdiń qurylýyna jyldar boıy atsalysqan, qazir soǵan jetekshilik etip otyrǵan ahmettanýshy Raıhan Imahanbet QazAqparat tilshisine eskiden jetken esti áńgimeni baıandaǵan edi.

Ahmettiń kózin kórgen zamandasy, rýhanı shákirti mereıtoıǵa jazǵan esteliginiń ishinde «Ahmet Baıtursynuly Áýlıekólge ekinshi ret muǵalim bolyp bardy» degen sóılem bar. Ol jer Qostanaı qalasynan 100 shaqyrymda jatyr. Ahmet Baıtursynuly sol jerde áýeli tájirıbeden ótip, keıinnen qaıta aınalyp soqqan. Osy jerde bolashaq jary Adeksandra Ivanovnamen tanysqan. Ahmet sabaq bergen mektepte Aleksandra da bastaýysh synyptarǵa sabaq bergen eken. Ekeýiniń qurmetine bir kóldi Muǵalimkól atandyrǵan. Ol jerde jeti kól bar. Sonyń ishinde Muǵalimkól Ahmet sabaq bergen mekteptiń irgesinde ǵana jatyr. Ol ǵımarattyń qabyrǵasy áli bar», - deıdi mýzeı jetekshisi.

Ahmettanýshy Aleksandra men Ahmet Baıtursynulynyń arasynda ińkár sezim bolmasa, kólge Muǵalimkól ataýy berilmes edi dep topshylaıdy.

«Ahmet Baıtursynuly sol jerdegi Muhamedsadyq degen tatardyń úıinen páter jaldaıdy. Álgi tatardyń Badrısafa degen qyzy bolady. Balıǵat jasyna tolar shaǵynda ol qyzy aýyryp qaıtys bolady da, Muhamedsadyq Ahmettiń bolashaq jaryna óz qyzynyń qujatyn beredi. Ahmet pen Aleksandra Qostanaıdaǵy bir meshitke barady. Ókinishke qaraı, ondaǵylar muny qoldamaıdy. Aqyry olar Troıtskige baryp, nekelerin sonda qıǵyzady. Aleksandra, mine osy kezden bastap Badrısafa Baıtursynova bolyp jazylady. Ekeýiniń nekesi talapqa saı bolýy úshin Badrısafa tatar meshitinde úsh aı musylmandyq mektepten ótken. Qujatta ultynyń tusyna tatar dep jazdyrǵan. Óıtkeni túri qazaqqa uqsamaǵan», - deıdi ahmettanýshy.

Ahmet Baıtursynulynyń otbasylyq jaǵdaıyn kezinde betine salyq etip basqysy kelgender bolǵan kórinedi.

«Ahmetti keketkisi kelgen kisiler «Ákeń men aǵalaryńdy aıdaýǵa jibergen orystyń qyzyn elge nege ákeldiń» dep suraıtyn kórinedi.

Surasańyz, esimi – Aleksandra Ivanovna,

Rızamyn qudaıdyń ony maǵan qıǵanyna.

Bir kápirdi musylman ǵyp saýaptansam,

Turmaı ma, on moldanyń ımanyna», - dep óleńmen jaýap bergen eken», - deıdi Raıhan Imahanbet.

Aıta keteıik, 5 qyrkúıekte Ahmet Baıtursynulynyń dúnıege kelgenine 150 jyl toldy.