Ahmet Jubanovtyń 120 jyldyǵy TÚRKSOI kóleminde atalyp ótti
ASTANA. KAZINFORM — Qazaq mýzyka óneriniń kórnekti qaıratkeri, kompozıtor, dırıjer ári mýzykatanýshy Ahmet Jubanovtyń týǵanyna 120 jyl tolýyna oraı Ankara qalasynda mereıtoılyq is-sharalar uıymdastyryldy.
Baǵdarlama TÚRKSOI, Qazaqstannyń Túrkııadaǵy Elshiligi jáne Qazaqstan Respýblıkasynyń Ulttyq mýzeıimen birlesip ótkizildi.
Mereıtoılyq is-sharalar TÚRKSOI Bas hatshylyǵy ǵımaratynda ashylǵan kórmeden bastaldy. Munda Ahmet Jubanovtyń ómir joly, shyǵarmashylyq murasy, ǵylymı eńbekteri tanystyryldy.
Kórmeniń ashylý rásiminde TÚRKSOI Bas hatshysynyń orynbasary Saıyt ıÝsýf Ahmet Jubanovtyń shyǵarmashylyq murasy túrki halqynyń mýzykalyq dástúrin saqtap, keler urpaqqa jetkizýde aıryqsha mańyzdy ekenin atap ótti.
Baǵdarlama aıasynda ǵalym ári kompozıtordyń ómiri men ónerdegi joly týraly derekti fılm kórsetildi.
Mereıtoılyq is-sharalar Qazaqstan men Túrkııanyń ǵylym jáne mádenıet salasy ókilderiniń qatysýymen ótken halyqaralyq dóńgelek ústel otyrysymen jalǵasty. Qatysýshylar Ahmet Jubanovtyń mýzyka óneri men mýzykataný ǵylymynyń damýyna qosqan úlesin jáne túrki dúnıesindegi mádenı baılanystardy nyǵaıtýdaǵy rólin talqylady.
Baǵdarlama Ankara mýzyka jáne kórkem óner ýnıversıtetiniń Mýzaffer Sarysózen amfıteatry sahnasynda ótken Qurmanǵazy atyndaǵy Qazaq ulttyq halyq aspaptary orkestriniń kontsertimen aıaqtaldy.
Ahmet Jubanovtyń 120 jyldyǵyna arnalǵan Ankaradaǵy halyqaralyq is-sharalar kompozıtordyń ónerdegi ónegeli jolyn ulyqtap, túrki dúnıesindegi mádenı sabaqtastyqty odan ári bekemdeı tústi.
Aıta ketelik ult únin notaǵa túsirgen Ahmet Jubanovtyń týǵanyna 120 jyl tolǵan edi.
