«Ahmet jáne ulttyq bolmys» atty respýblıkalyq festıval bastaldy

ASTANA. QazAqparat – Astanada Ahmet Baıtursynulynyń 150 jyldyǵyna arnalǵan «Ahmet jáne ulttyq bolmys» atty respýblıkalyq festıvaldiń ashylý saltanaty ótti, dep habarlaıdy QazAqparat tilshisi.

Ahmet Baıtursynuly atyndaǵy Binom School mektep-lıtseıi men Astana halyqaralyq ýnıversıtetiniń pedagogıka kolledji uıymdastyryp otyrǵan festıval 19 qyrkúıek pen 19 qazan aralyǵynda ótedi.

Oǵan mektep muǵalimderi men oqýshylar, pedagog daıarlaıtyn oqý oryndary men ata-analar qaýymdastyqtary qatysa alady.

«Bir aı boıy úsh baǵyt boıynsha jumystar qabyldaımyz. Birinshi baǵyt – «Ahmet jaqqan shamshyraq» atty oqýshylar arasyndaǵy respýblıkalyq dramatýrgııalyq qoıylym baıqaýy. Ekinshi baǵyt – «Danalyq oıdan dán izde» atty ata-analar arasyndaǵy áleýmettik jeli chelendji. Bul saıysta ata-analar Facebook, Instagram, TikTok jelilerinde ult ustazynyń shyǵarmalaryn ózderi oryndap, nasıhattaýy kerek. Úshinshi baǵyt – A.Baıtursynuly muralarynyń zamanaýı bilim berýdegi orny men mańyzy» atty respýblıkalyq ǵylymı-tájirıbelik konferentsııa. Festıval onlaın-ishteı jáne onlaın-syrttaı formatta ótedi. Oǵan qatysý úshin ótinim men jumys materıaldaryn 15 qazanǵa deıin ótkizý qajet», - deıdi mektep dırektory Mars Áblezov.

Festıvaldiń ashylý saltanatynda aqyn Nesipbek Aıtulynyń «Ahmet» atty jańa poemasynyń tusaýy kesildi.

Sharaǵa qatysqan QR Parlamenti Senatynyń depýtaty Altynbek Nuhuly, poema avtory Nesipbek Aıtuly jáne «Ahmet. Ult ustazy» serıalynyń stsenarıı avtory Ularbek Nurǵalymuly sóz sóılep, sharany tamashalaýǵa kelgen oqýshylar men kolledj stýdentteriniń saýaldaryna jaýap berip, rýhanı áńgime qurdy.

Foto: upload.wikimedia.org