«Ahmet. Ult ustazy» serıaly nege Torǵaı men Orynborda túsirilgen joq
«Bizdiń ǵylymı keńesshimiz – Almatydaǵy Ahmet Baıtursynuly murajaıynyń dırektory, ǵalymǵa arnap «Ǵasyr sańlaǵy» degen kitap jazǵan Raıhan Imahambetova. Kórkemdik keńesshimiz Ushqyn Saıdrahmanuly degen alashtanýshy boldy. Stsenarıı jazylǵan kezde osy kisiler bastan-aıaq qasymyzda boldy. Stsenarııdi belgili dramatýrg, jazýshy Ularbek Nurǵalymulymen birigip jazdyq. Stsenarıı túzý barysynda 50 shaqty kitap paıdalandyq», - dedi kıno mamany.
Onyń sózine qaraǵanda, serıal túsirý kezinde Ahmet Baıtursynulynyń kózin kórgenderdiń bolmaýy onyń obrazyn keskindeýde biraz qıyndyq týǵyzǵan.
«Qıyndyq jaǵyna kelsek, Ahmettiń «a» degen áribin aıtýǵa tyıym salynǵan zaman boldy. Onyń kózin kórgender, qasynda otyryp, áńgimesin tyńdaǵan adamdardyń kóbi qaıtys bolǵandyqtan estelikter joq. Naqty qalaı bolǵany jaıly qujattyq derekter negizinde ǵana Alash qaıratkeriniń ómirin 6 serııaǵa syıǵyzýǵa tyrystyq. Árıne, zertteýshiler arasynda bir toqtamǵa kele almaı júrgen máseleler bar. Biraq bizdiki derekti dúnıe emes. Biz sonyń ishinde kórkemdik shyndyqqa, serıaldyń dramatýrgııasyna sáıkes keletin, sóıte tura Ahmet Baıtursynulynyń tulǵasyna kóleńke túsirmeıtin, kerisinshe asha túsetin derekterdi aldyq. Jalpy Ahmet - daý-damaı týdyratyn qaıshylyqty tulǵa emes qoı», - deıdi rejıser.
Aıtýynsha, serıalǵa lokatsııa retinde kóbine Almatynyń mańaıyndaǵy jerler alynǵan.
Al Orynbor men Torǵaıdaǵy tarıhı nysandardy paıdalanbaýdyń ózindik sebepteri bar kórinedi.
«Negizgi lokatsııa - Almaty oblysy, Jarkent, Almaty qalasy boldy. «Nege Torǵaı men Orynborǵa barmadyńyzdar?» degen suraqtyń qoıylýy zańdy shyǵar. Birinshiden, qarjylyq múmkindigimiz kótermeıtin edi. Qarjy tapqan kúnniń ózinde ol jaqta ıen daladan basqa eshqandaı ınfraqurylym joq. Mynaý osyndaı irgetas dep kórsetetin derekti týyndy emes qoı. Tolyq dekoratsııa bolýy kerek. Sol úshin Almatynyń mańaıy yńǵaıly boldy. Serıal Ahmet Baıtursynulynyń el isine aralasqan kezinen bastalady. Serıal sıýjetin uly tulǵanyń aǵartýshylyq, ǵalymdyq, pýblıtsıstik qyryn kórsetý úshin ómirindegi teoretık ǵalym jáne saıası qaıratker retinde tanytatyn kezeńder men epızodtardan quraýǵa tyrystyq», - dedi Murat Esjan.
