Ahmet Baıtursynulynyń mereıtoıyna arnalǵan respýblıkalyq aıtys ótedi

ASTANA. QazAqparat - Qazaqstan Respýblıkasynyń Memlekettik keńesshisi Erlan Qarınniń tóraǵalyǵymen ult ustazy, «Alash» qozǵalysynyń qaıratkeri Ahmet Baıtursynulynyń 150 jyldyq mereıtoıyn daıyndaý jáne ótkizý jónindegi memlekettik komıssııanyń otyrysy ótti, dep habarlaıdy Aqorda.

Otyrysta memlekettik organdardyń basshylary mereıtoı aıasynda atqarylyp jatqan ǵylymı-zertteý, aǵartýshylyq, mádenı-buqaralyq baǵyttaǵy jumystar jaıynda baıandady.

QR Ǵylym jáne joǵary bilim mınıstri Saıasat Nurbek Memleket basshysynyń Jarlyǵyna sáıkes Qazaqstan Respýblıkasynyń Ahmet Baıtursynuly atyndaǵy gýmanıtarlyq ǵylymdar salasyndaǵy memlekettik syılyǵy taǵaıyndalǵanyn atap ótti. Sonymen qatar ol ıÝNESKO-nyń Parıj qalasyndaǵy shtab-páterinde Ahmet Baıtursynulynyń 150 jyldyq mereıtoıyna arnalǵan ǵylymı konferentsııa ótkenin, onda «Ahmet Baıtursynuly. Tańdamaly shyǵarmalary» (qazaq, aǵylshyn, orys, túrik tilderinde) kitabynyń tusaýy kesilgenin aıtty. Budan bólek bıyl TÚRKSOI uıymy halyqaralyq deńgeıdegi ǵalymdar men zertteýshilerge jyl saıyn Ahmet Baıtursynuly atyndaǵy tósbelgi taǵaıyndaǵanyn jáne Almaty qalasynda ult ustazynyń eskertkishi ashylatynyn jetkizdi.

QR Mádenıet jáne sport vıtse-mınıstri Nurǵısa Dáýeshov Ahmet Baıtursynulynyń ómiri men qaıratkerligine arnalǵan «Sońǵy úkim» kınojobasynyń túsirilimi jyl aıaǵyna deıin aıaqtalatynyn, jeltoqsan aıynda mereıtoıǵa arnalǵan respýblıkalyq aıtys ótkiziletinin atap ótti.

Qostanaı oblysynyń ákimi Arhımed Muhambetov Torǵaı óńirinde Ahmet Baıtursynuly men Mirjaqyp Dýlatulynyń eskertkishi ashylǵanyn, Qostanaı oblysyndaǵy Ahmet Baıtursynuly men Mirjaqyp Dýlatulynyń ádebı murajaıyna abattandyrý jumystary júrgizilgenin aıtty.

Otyrysty qorytyndylaı kele, Memlekettik keńesshi Erlan Qarın Ahmet Baıtursynulynyń murasyn nasıhattaýǵa baǵyttalǵan is-sharalardy jyl sońyna deıin joǵary deńgeıde ótkizý qajet ekenine toqtaldy. Sondaı-aq Túrkistan qalasynda Halyqaralyq túrkitanýshylar kongresin uıymdastyrýdy, ult ustazynyń 12 tomdyq shyǵarmalarynyń jınaǵyn shyǵarýdy, «Ahmet Baıtursynuly» tósbelgisin daıyndaý jumystaryn júrgizýdi tapsyrdy.

Foto: akorda.kz