Ahmet Baıtursynulynyń kindik qany tamǵan úı jóndeledi
Gazettiń jazýynsha, Qostanaı oblysynda 29 kıeli jer belgilenip, olardyń kartasy jasalǵan bolatyn. Osy qasıetti oryndardyń 10-y jalpyulttyq, qalǵan 19-y jergilikti mańyzǵa ıe. Respýblıka maqtanyshyna aınalǵan sakraldy oryndarǵa Qostanaı oblysynda Torǵaı geoglıfteri, Qamysty mekeni, Ekidiń dinı eskertkishi, Baraq, Jáýke, Ybyraı Altynsarın, Mirjaqyp, Abdyǵapar han, Keıki batyr keseneleri, sonymen qatar Amangeldi batyr jerlengen oryn jatady.
«Bıyl oblys óńirindegi barlyq kıeli oryndar kórkeıtiledi, sonyń ishinde aıyryqsha jóndeýdi qajet etetin ult ustazy Ahmet Baıtursynulynyń Jangeldın aýdanyndaǵy týǵan úıi, Baraq batyr kesenesi jáne Qostanaı qalasyndaǵy Svıato-Nıkolskıı shirkeýi nazarǵa alynyp otyr. Olar kúrdeli jóndeýden ótedi. Ahmet Baıtursynuly týǵan úıdi osydan birneshe jyl buryn aldymen Arqalyq qalasyndaǵy Elena Tsventýh basqaratyn «Jas ulan» balalar men jasóspirimder ortalyǵy uıymdastyrǵan tarıhı-tanymdyq ekspedıtsııa Ahań týǵan óńirdiń tarıhyn, onyń kindik qany tamǵan úıdiń taǵdyr-talaıyn jaqsy biletin aqsaqaldardy ertip baryp, qulap qalǵan tamnyń irgetasynan kesegin alyp, belgilep, keıinnen ony qalpyna keltirý týraly bastama da kótergen bolatyn. Birshama ýaqyt ótken soń Ahań urpaqtary turatyn Aqkól-Qarasý aýylynyń jastary asarlatyp, qulap, irgetasynyń orny ǵana qalǵan ǵımarattyń qabyrǵasyn qaıta turǵyzdy. Biraq qam kesekten salynǵan úı ýaqyt kóshine shydamaı, tozyp barady. Endi, mine, «Rýhanı jańǵyrý» baǵdarlamasynyń aıasynda úıdiń tolyq kúrdeli jóndeýden ótetini týraly jaqsy habar jurttyń kóńiline qýanysh uıalatty. Ol Torǵaı óńirine aıaq basqandardyń baryp kóretin, kemeńger adam kindiginiń qany tamǵan jerge taǵzym jasaıtyn orynǵa aınalatyn bolady» delingen maqalada.
