Ahmet Baıtursynuly músininiń avtory: Eskertkish tulǵanyń kelbetimen qosa, ishki jan-dúnıesin de ashýy tıis

ASTANA. QazAqparat - Ult ustazy Ahmet Baıtursynulynyń beınesin erekshe jasaǵan músinshiniń týyndysy áleýmettik jelide eldi súısindirip, jurttyń yqylasyna bólengenin baıqaǵan edik. Soǵan oraı, QazAqparat tilshisi áleýmettik jelide qyzý talqyǵa túsip jatqan músinniń avtorymen tildesip, týyndy týraly surap-bildi.

Ahmet Baıtursynulyn aınytpaı beınelegen músinniń avtorlary - Búrkitbaev Aıdos Sábıtuly jáne Tımýr Mırasuly Ermuhametov eken.

«Bul músindi jasap jatqanymyzǵa 1 aıǵa jaqyndady. Negizgi jumystar bitti. Buıyrsa, Almaty qalasyna qoıylady. Músin qoladan quıylady, tuǵyry granıt tastan jasalǵan. Músiniń bıiktigi - 3,5 metr, tuǵyry - 1,5 metr, jalpy bıiktigi 5 metr bolady. Ahmet atamyzdy bilmeıtin kisi joq shyǵar, ult ustazynyń beınesin jasaýda ol kisiniń muraǵattardaǵy sýretterin qaradyq, jas kezindegi, qartaıǵan kezindegi beınelerin izdedik. Ómir joly týraly qaıtalap oqydyq», - deıdi músinniń avtory Aıdos Sábıtuly.

10 jydan beri osy salada jumys istep kele jatqan azamattar buǵan deıin de kóptegen tulǵalardyń eskertkishin jasaýǵa atsalysypty. Bári de jurttyń kóńilinen shyqqan týyndylar.

«Buǵan deıin Almatyda asharshylyq qurbandaryna qoıylǵan eskertkishtiń beınesin jasadyq. Astana qalasyna qoıylǵan Ábý Nasyr ál-Farabı, Almatyda Nurtas Ońdasynov, Shámshi Qaldaıaqovtyń eskertkishterin jasadyq. Jaqynda Taraz qalasynda qoıylǵan Sherhan Murtaza atamyzdyń eskertkishi de bizdiń týyndy. Tulǵalarǵa arnalǵan týyndynyń sátti shyǵýy, onyń syrtqy kelbeti ǵana emes ishki jan-dúnıesine úńilgendigimizden bolar. Biz ózimiz kirisip, jasaıtyn tulǵanyń ómirimen tolyq tanysamyz, oqyp zertteımiz, sýretterin, beıne materıaldaryn aqtaramyz, sol arqyly eskertkishke minezin, jan-dúnıesin sińirýge tyrsamyz», - deıdi Aıdos Sábıtuly.

Esterińizge sala keteıik, qazaqtyń rýhanı kósemi atanǵan Alash ardaqtysy, Ult ustazy Ahmet Baıtursynulynyń týǵanyna bıyl 150 jyl tolyp otyr.

Ulttyń uly tulǵasyn ulyqtaýǵa arnalǵan merekelik shara Jangeldın aýdanynyń ortalyǵy Torǵaıdan bastaý alǵan bolatyn. Onda uly tulǵa eskertkishi ornatylyp, týǵan jeri Sarytúbekte aq kesene boı kótergen edi.