Ahmet Baıtursynuly dúnıege kelgen úı qalpyna keltirildi

ASTANA. QazAqparat - Qostanaı oblysy Jangeldi aýdanynyń turǵyndary Ahmet Baıtursynuly dúnıege kelgen úıdi qalpyna keltirdi. Bıyl ult kóseminiń úıinde aýqymdy jóndeý jumystary jalǵasatyn bolady, dep habarlaıdy QazAqparat alau.kz-ke silteme jasap.  

A. Baıtursynuly aýylynyń janynda kóne qorym bar. Sazdan soǵylǵan qorshaýlar ábden úgitilip bitken. A. Baıtursynulynyń týystary jerlengen bir ǵasyr burynǵy zırattar da birte-birte jemirilýde. Moladan bir shaqyrymdaı jerde, Aqkól jáne A. Baıtursynuly aýyldarynyń arasynda kishigirim úı bar. Kónekóz qarttardyń aıtýynsha, sol jerde 1872 jylǵy 5 qyrkúıekte «Alash» partııasynyń ókili, qazaqtyń uly ǵalymy ári aǵartýshy Ahmet Baıtursynuly dúnıege kelgen.

Ol kezderi munda Sarytúbek aýyly otyrǵan.

«Ata-babalarymyzdyń aıtýynsha, Ahmet Baıtursynuly týǵan úı qaz-qalpynda saqtalǵan. Keńestik kezeńde osynda qonystanǵan keńshardyń baqtashylary da ony barynsha saqtaǵan. Biraq keıin úı buzylyp ketti. Eki aýyldyń jastary úıdi baıaǵy pishini boıynsha qalpyna keltirdi», - dep habarlaıdy Aqkól aýylynyń ákimi Balǵabaı Qalıev.
 

Úıdi saqtalyp qalǵan irgetasynyń arqasynda qalpyna keltirý múmkin boldy. Munda bar bolǵany eki bólme bar, olarǵa ortaq bir pesh salynǵan. Endi úıde kishigirim mýzeı de bar. Mýzeıdi negizinen mektep oqýshylary kelip tamashalaıdy.

Bıyl úıdi kúrdeli jóndeý týraly sheshim qabyldanyp, oǵan 11 mln teńge mólsherinde qarajat bólindi.