Ahmet Baıtursynuly atyndaǵy respbýlıkalyq baıqaýdyń jeńimpazy anyqtaldy
Ult ustazy Ahmet Baıtursynuly atyndaǵy respýblıkalyq baıqaýdy Til saıasaty komıteti uıymdastyrdy. Baıqaýǵa elimizdiń ár óńirindegi tilderdi oqytý ortalyǵynyń oqytýshylary qatysty.
Úsh kezeńnen turatyn baıqaýǵa A. Baıtursynuly atyndaǵy Bilim akademııasynyń dırektory, ahmettanýshy, fılologııa ǵylymdarynyń kandıdaty Ulan Erkinbaı tóraǵalyq etti. Al, qazylar alqasy bilikti pedagog-ádiskerler men ǵalymdardan quralǵan.
«Jyl saıyn keńinen tanymal bolyp kele jatqan dástúrli baıqaýdyń basty maqsaty – ult ustazynyń ádistemelik eńbekterin zerdeleý arqyly onyń til meńgertýge qatysty utymdy ádis-tásilderin anyqtap nasıhattaý. Sondaı-aq oqytýshylardyń kásibı biliktiligin jetildire otyryp, eresekterge qazaq tilin úıretýdiń sapasyn arttyrý, ózara tájirıbe almasý», - dedi Ulan Erkinbaı.
Baıqaýdyń alǵashqy kezeńinde qatysýshylar ózin jáne avtorlyq baǵdarlamasyn tanystyrdy. Ekinshi kezeńde uıashyqtan tańdalǵan qos suraqqa jaýap berdi. Úshinshi kezeńde úmitkerler ózge etnos ókilderinen quralǵan topqa oqý, jazý, tyńdaý jáne aıtý túrlerine tapsyrma berip, 20 mınýttyq dáris ótkizdi.
Qazylar alqasynyń sheshimimen baıqaýdyń bas júldesi men 500 myń teńgege Qyzylorda oblysynyń tilderdi oqytý ortalyǵynyń memlekettik til oqytýshysy Gúljanat Dúzenova ıe boldy. Birinshi orynnyń 350 myń teńgelik júldesin Jetisý oblystyq «Til» oqý-ádistemelik ortalyǵynyń memlekettik til oqytýshysy Janar Elesbaeva ıelendi.
Ekinshi oryn men 250 myń teńge syılyqtyń Aqtóbe oblysyndaǵy Tilderdi oqytý ortalyǵynyń ádiskeri Aqmaral Nurjanova men Qaraǵandy oblysynyń tilderdi oqytý ortalyǵynyń ádiskeri Múnıra Aǵymbaeva ıegeri atandy.
Úshinshi orynnyń 200 myń teńgeli júldesine Jambyl oblysy, Qordaı aýdandyq tilderdi oqytý ortalyǵynyń qazaq tili oqytýshysy Altynaı Áshimhan, Qostanaı oblystyq «Tildaryn» oblystyq tilderdi oqytý ortalyǵynyń Gúlmıra ádiskeri Kirikpenova, Aqmola oblystyq oqý-ádistemelik ortalyǵynyń oqytýshysy Aıman Jaqanova laıyq dep tanyldy.
Eske sala ketelik, budan buryn Atyraýda Mahambetke arnalǵan aqyndar músháırasynyń jeńimpazy anyqtalǵanyn jazǵan edik.
