Ahmadınejad Qurandy qorǵap sóılegeni úshin Rım Papasyna alǵys bildirdi
ASTANA. Qazannyń 7-si. QazAqparat - Iran Prezıdenti Mahmud Ahmadınejad Rım Papasy XVI Benedıktke hat joldap, Quran kitaptaryn órteýge jol bermeýge qatysty pontıfıktiń ustanymyna qoldaý bildirdi.
Bul týraly búgin ırandyq basylymdarǵa silteme jasap «RIA «Novostı» agenttigi habarlady.
Óz hatynda Ahmadınejad, qaqtyǵystardyń aldyn alý úshin búgingideı zamanda túrli din ókilderiniń arasynda turaqty dıalog pen ózara qarym-qatynastardyń kerek ekenin atap kórsetti. Islam Respýblıkasynyń basshysy hatynyń sońynda, Rım Papasynyń densaýlyǵy men onyń barlyq ıgi bastamalary úshin duǵa jasaıtynyn jetkizdi.
Esterińizge sala keteıik, qyrkúıektiń 11-inde Amerıkanyń Neshvıll qalasynyń irgesinde eki hrıstıan svıashennıgi óz úıleriniń aýlasynda Quran kitabynyń kóshirmesin órtegen bolatyn.
