AHQO sotyna talap-aryzdy álemniń kez kelgen núktesinen jiberýge bolady

ASTANA. QazAqparat - Búgin Astana halyqaralyq qarjy ortalyǵy soty men Halyqaralyq tórelik ortalyǵy eJustice elektrondyq sot tóreliginiń jańa júıesin resmı iske qosty, dep habarlaıdy QazAqparat tilshisi.

EJustice - bul onlaın-portal. Ol taraptarǵa AHQO men HTO sotyna elektrondyq túrde álemniń kez kelgen núktesinen Astanaǵa kelip qatysýsyz talap-aryz berýge múmkindik jasaıdy. Portal zań qujattaryn elektrondyq óńdeý jáne sot isin júrgizýdi ákimshilendirýdiń barlyq úderisin basqarýǵa kómek kórsetedi.

«Biz AHQO jáne HTO sotynda daýlardy ýaqytyly jáne ekonomıkalyq tıimdi sheshýdi aıtarlyqtaı jaqsartatyn eJustice elektrondy sot tóreligi júıesin usynǵanymyzǵa qýanyshtymyz. Daýlardy sheshýdiń eń ozyq halyqaralyq standarttaryn engizýge tyrysamyz jáne eJustice júıesi - AHQO men HTO sotyna Eýrazııalyq aımaqta azamattyq jáne kommertsııalyq daýlardy sheshýdi tańdaýdyń nómir birinshisi bolýǵa múmkindik beretin bizdiń sońǵy jańalyǵymyz», - dedi shara aıasynda BAQ ókilderine suhbat bergen AHQO jáne HTO sot apparatynyń basshysy Krıstofer Kempbell-Holt.

Al sıngapýrlyq Crimsonlogic kompanııasynyń bas dırektory So Ken Iıdiń aıtýynsha, «eJustice» júıesi Chrysalis álemdik sanattaǵy zańdy ónimin, búkil álemdegi jetekshi elder paıdalanatyn standartty emes fýnktsıonaldyq múmkindikteri men sıpattamalary bar tekserilgen qosymshany paıdalana otyryp qurylǵan.

«Júıeni rekordtyq merzimde engizý AHQO-nyń Crimsonlogic kompanııasymen tamasha yntymaqtastyǵynyń dáleli sanalady. Biz AHQO sot isin júrgizýdi jańǵyrtý jónindegi bastamasynyń bir bóligi bolýǵa óte qýanyshtymyz jáne jańa júıe paıdalanýǵa yńǵaıly ári ońaı bolatynyna senimdimiz», - dedi ol.