AHQO sotynda jasandy ıntellekt qoldanyla bastady
ASTANA. KAZINFORM – «Astana» halyqaralyq qarjy ortalyǵynyń sotynda jasandy ıntellekt qoldanyla bastady. Bul týraly Astana Finance Days aıasynda AHQO basqarýshysy Renat Bekturov aıtty.
Onyń aıtýynsha, buryn sot otyrysynda aıtylǵan sózderdi arnaıy maman jazyp otyrsa, qazir bul jumys avtomattandyrylǵan.
- Buryn sotta stenografıst jumys isteıtin. Qazir aıtylǵan sózder úsh tilde avtomatty túrde mátinge túsiriledi. Tipti sot otyrysynda birneshe til qatar qoldanylsa da, júıe olardy ajyratyp, mátinge túsire alady, – dedi Renat Bekturov.
AHQO-da jasandy ıntellekt jańa qatysýshylarǵa aqparat berý úshin de paıdalanylady. Ortalyq arnaıy vırtýaldy kómekshi ázirlegen. Ol saıtqa kirgen adamnyń suraqtaryna jaýap berip, qyzmetine qaraı qandaı lıtsenzııa qajet ekenin jáne ony alý úshin qandaı talaptardy oryndaý keregin túsindiredi.
Bekturovtyń sózinshe, AHQO jasandy ıntellektini paıdalanýǵa qatań shekteý qoımaıdy. Alaıda mańyzdy sheshimderdi tek jasandy ıntellektiniń ózine tapsyrýǵa bolmaıdy. Onyń bergen aqparaty men qorytyndysyn mindetti túrde adam tekserýi kerek.
- Qarjy salasy qatelikti keshirmeıdi. Mysaly, adamdar aqshasynan aıyrylyp qalýy múmkin. Sondyqtan ázirge sheshim qabyldaýǵa adam qatysyp, oǵan ózi jaýap beredi, - dedi ol.
Sonymen qatar AHQO-da býhgalter men zańgerdiń keıbir jumysyn jasandy ıntellektke tapsyrý múmkindigi de qarastyrylyp jatyr. Bul rette ortalyq basqa elderdiń tájirıbesin zerttep, jasandy ıntellektiniń qarjy salasynda qalaı qoldanylyp jatqanyn baqylap otyr.
Aıta keteıik, búgin elordada Astana Finance Days forýmy ótip jatyr. Bıylǵy is-sharaǵa álemniń 90 elinen 8 myńǵa jýyq qatysýshy tirkelgen. Forým aıasynda Qazaqstannyń taý-ken jáne kreatıvti ındýstrııa salasyndaǵy jobalary sheteldik ınvestorlarǵa tanystyrylyp jatyr.
