AHQO shymkenttik bıznes ókilderin birlesip jumys isteýge shaqyrdy

ShYMKENT. QazAqparat -   «Astana» halyqaralyq qarjy ortalyǵy shymkenttik bıznes ókilderin birlesip jumys isteýge shaqyrdy. Jergilikti kásipkerlermen kezdesken ortalyq sarapshylary bızneske qandaı jaǵdaı jasalǵany, jasyl jáne ıslam oblıgatsııalaryn shyǵarý erekshelikteri jóninde baıandady, dep habarlaıdy QazAqparat tilshisi.

«Halyqaralyq ınvestorlar aptalyǵy - 2018» aıasynda uıymdastyrylǵan sharada óńirlik bızneske arnalǵan prezentatsııa ótti. Onda AHQO ókilderi ortalyqqa tirkelý protsedýrasynyń artyqshylyqtary men tıimdi tustaryn túsindirdi. 

«Biz aımaqtaǵy bıznes ókilderine ortalyqtyń jumysyn, baǵytyn túsindirip, qarjy salasy boıynsha keńinen baıandap otyrmyz. Mysaly, ıslamdyq jáne jasyl qarjylandyrý jaıly aıtyp jatyrmyz. Bizdiń ortalyqqa úlken kompanııalar, bankter kelip, tirkelip, ózderiniń ofısterin asha alady. Sol arqyly basqa da qarjy ortalyqtarymen baılanys ornatýǵa bolady. Investorlarmen tanysyp, olar týraly tolyqqandy aqparat alýǵa múmkindik bar. Basqa da alys-jaqyn shet elderdegi qarjy ortalyqtarymen jumys isteýge jaǵdaı jasalady»,- deıdi AHQO Islam qarjylandyrý departamentiniń menedjeri Qazybek Juman. 

Basqosýda sondaı-aq, qarjy qyzmetteri boıynsha tutynýshylardyń quqyǵyn qorǵaý jáne ınvestıtsııalaý negizderin túsindirý boıynsha baıandamalar oqyldy.

«Azamattar jańadan qarjylyq qyzmettermen aınalysatyn kompanııa ashqysy kelse, bizdiń ortalyqta bıznes-jospar jasaı alady. Jospar bizdiń talaptarymyzǵa jaýap berse, ortalyqqa tirkeımiz. Jan-jaqty qarastyryp, aqparattyq qoldaý kórsetemiz. Kásipkerler ortalyqqa tirkelý arqyly aǵylshyn zań qaǵıdalaryna saı jumys isteıtin halyqaralyq sotqa júginip, óz quqyqtaryn qorǵaı alady. Tórelik etetin ortalyqqa da aryzdana alady. Keı jaǵdaılarda jeke jáne tabys salyǵynan bosatylady. Sheteldik azamattar kásipkerlikpen aınalysam dese, ózi jáne otbasy músheleri 5 jylǵa deıin vızasyz jumys isteı alady. Osy syndy kóptegen jeńildikter qarastyrylǵan»,-deıdi AHQO qarjy qyzmetterin retteý komıtetiniń sarapshysy Aıym Qaldyhan. 

Aıta keteıik, elimizde 1 qazannan bastap Investorlardyń ekinshi halyqaralyq aptalyǵy ótýde. WIW-2018 jahandyq bastamasyn qoldaý maqsatynda «Astana» halyqaralyq qarjy ortalyǵy Qazaqstannyń Astana, Almaty, Shymkent, Atyraý, Qaraǵandy, Qostanaı jáne Óskemen syndy iri qalalarynda turǵyndardyń qarjylyq jáne ınvestıtsııalyq saýattylyǵyn arttyrý boıynsha túrli formattaǵy is-sharalar ótkizip jatyr. Bir apta boıy 80-nen astam qarjylyq retteýshi uıym men 6 qurlyqtyń qarjy naryǵyna múddeli qatysýshylary bas qosýda.