AHQO retteýshilik «qumsalǵyshyna» halyqaralyq kompanııalardyń qyzyǵýshylyǵy artyp otyr
ASTANA. KAZINFORM — Astana halyqaralyq qarjy ortalyǵynyń retteýshilik «qumsalǵyshynda» búginde 24 kompanııa ınnovatsııalyq sheshimderin synaqtan ótkizip jatyr. Bul týraly AHQO Qarjylyq qyzmetterdi retteý komıtetiniń qarjylyq tehnologııalar departamentiniń dırektory Altaı Slıamov málimdedi.
Onyń aıtýynsha, qazirgi negizgi mindetterdiń biri óz ınnovatsııalyq ónimderi men qyzmetterin synaqtan ótkizip úlgergen qatysýshylardyń tolyqqandy retteý rejımine kedergisiz ótýin qamtamasyz etý bolyp otyr.
— Búginde 24 kompanııa bizdiń retteýshilik «qumsalǵysh» aıasynda ınnovatsııalyq qyzmetterin synaqtan ótkizip, damytyp jatyr. Birqatar kompanııa tolyqqandy retteý rejımine kóshý rásiminen ótip úlgergen, al keıbiri osy kezeńniń aldynda tur. Bul protsess qatysýshylardyń daıyndyǵyna qaraı ashyq ári túsinikti qaǵıdalar negizinde júzege asyrylady, — dedi ol.
Sonymen qatar departament basshysy sheteldik kompanııalar tarapynan da qyzyǵýshylyqtyń joǵary ekenin atap ótti.
— Qazirgi tańda bizdiń retteýshilik «qumsalǵysh» aıasynda ınnovatsııalyq sheshimderin synaqtan ótkizýge nıetti halyqaralyq oıynshylar tarapynan úlken qyzyǵýshylyq baıqalyp otyr, — dedi spıker.
Sondaı-aq ol ortalyqta retteýshilik «qumsalǵyshtyń» normatıvtik bazasyn jetildirý jumystary júrgizilip jatqanyn eske saldy. Atap aıtqanda, onyń qatysýshylarynyń qyzmetin retteıtin negizgi qujattardyń birine ózgerister engizý josparlanǵan.
Mundaı ózgerister onyń aıtýynsha, qatysýshylar úshin tıimdi tásil usynyp, «qumsalǵyshqa» kirý sharttaryn jeńildetýge múmkindik beredi. Bul jańashyl jobalardy synaqtan ótkizýge nıetti qazaqstandyq jáne sheteldik kompanııalar úshin qolaıly jaǵdaı qalyptastyrýǵa baǵyttalyp otyr.
Budan bólek ol ortalyqtyń naryq qatysýshylarymen ashyq dıalog júrgizýge jáne qarjy tehnologııalary men tsıfrlyq aktıvter salasyndaǵy jańa jobalardy qarastyrýǵa ázir ekenin eske saldy.
Buǵan deıin Ulttyq banktiń retteýshilik «qumsalǵyshynda» 30-dan astam krıptojoba synaqtan ótip jatqany jóninde jazdyq.
https://kaz.inform.kz/news/ulttik-banktn-retteushlk-kumsalgishinda-30-dan-astam-kriptozhoba-sinaktan-otp-zh-dce86fbb
