AHQO modeli Oman, Ózbekstan jáne Qyrǵyzstanda qoldanyla bastady
ASTANA. KAZINFORM – Birqatar memleket «Astana» halyqaralyq qarjy ortalyǵynyń modeline uqsas qarjy ortalyqtaryn quryp jatyr. Bul týraly Astana Finance Days aıasynda AHQO basqarýshysy Renat Bekturov aıtty.
Onyń sózinshe, Qazaqstannyń qarjy ortalyǵyn damytý jáne ınvestıtsııa tartý tájirıbesine basqa elder de qyzyǵýshylyq tanytyp otyr.
– Barlyq elde ınvestıtsııa tartýǵa qatysty máseleler uqsas. Sondyqtan biz qarjy ortalyǵynyń osy baǵyttaǵy tájirıbesimen bólisip jatyrmyz. Birqatar memleket bizdiń modeldi negizge alyp, óz qarjy ortalyqtaryn quryp jatyr. Máselen, Oman, Ózbekstan jáne Qyrǵyzstanda osyndaı ortalyqtar qurylyp jatyr. Aldaǵy ýaqytta basqa elderde de paıda bolýy múmkin, – dedi Renat Bekturov.
Onyń aıtýynsha, AHQO jınaqtaǵan tájirıbesin sheteldik retteýshilermen de bólisip keledi. Bıyl Astana Finance Days-ke birqatar eldiń qarjy salasyn retteýshi organdarynyń ókilderi kelgen.
Sonymen qatar AHQO jasyl qarjy naryǵyn damytýdaǵy tájirıbesin de basqa memleketterge usynyp otyr. Atap aıtqanda, Ózbekstan, Qyrǵyzstan jáne Ázerbaıjanda jasyl oblıgatsııalar naryǵyn damytýǵa qatysty tájirıbe almasý júrgizilgen.
Bekturovtyń aıtýynsha, endigi maqsat – osy tájirıbeni qoldanatyn elderdiń aıasyn keńeıtý.
Aıta keteıik, búgin elordada Astana Finance Days forýmy ótip jatyr. Bıylǵy is-sharaǵa álemniń 90 elinen 8 myńǵa jýyq qatysýshy tirkelgen. Forým aıasynda Qazaqstannyń taý-ken jáne kreatıvti ındýstrııa salasyndaǵy jobalary sheteldik ınvestorlarǵa tanystyrylyp jatyr.
