AHQO komıteti IOSCO-nyń Keńeıtilgen kópjaqty ózara túsinistik týraly memorandýmyna qol qoıýshy boldy
Bul másele boıynsha sheshim 9-18 qarasha aralyǵynda vırtýaldy túrde ótken IOSCO jyl saıynǵy jınalysynyń sheńberinde qabyldandy. Atap aıtqanda, AFSA tutynýshylardy qorǵaý, mindetti aıǵaqtar alý jáne aýdıtorlyq qujattarmen almasý úshin aktıvterdi májbúrlep toqtatý salasynda transshekaralyq yntymaqtastyqty júzege asyrýǵa múmkindik beretin A2 qosymshasyna (ACF ókilettigi) qol qoıdy.
EMMoU Kópjaqty ózara túsinistik memorandýmyn (MMoU) tolyqtyratyn baǵaly qaǵazdar men týyndy qarjy quraldary týraly zańdar men erejelerdi saqtaýdy qamtamasyz etýdegi halyqaralyq yntymaqtastyqtyń álemdik baǵdary bolyp tabylady. 2002 jyly qabyldanǵan alǵashqy MMoU halyqaralyq transshekaralyq yntymaqtastyq pen retteýshi organdar arasyndaǵy baǵaly qaǵazdar týraly aqparat almasý úshin jahandyq negiz jasady. Alaıda, kapıtal naryqtarynyń jumys isteý protsesiniń kúrdeliligin jáne sońǵy tehnologııalyq jetistikterdi eskere otyryp, 2016 jyly IOSCO Keńeıtilgen kópjaqty ózara túsinistik týraly memorandýmdy qabyldady. EMMoU qol qoıýshylary bir-birine quqyq qorǵaý organdarynyń transshekaralyq yntymaqtastyǵyndaǵy kómektiń jańa nysandaryn usynýǵa kelisedi, mysaly, tutynýshylardy qorǵaý úshin aktıvterdi toqtatý, májbúrli aıǵaqtar alý, aýdıtorlyq qujattarmen almasý jáne t.b. EMMoU týraly tolyǵyraq aqparatty myna jerden tabýǵa bolady.
AFSA EMMoU-ǵa qol qoıǵan Ortalyq jáne Shyǵys Eýropa, Ortalyq Azııa jáne Kavkaz óńirindegi alǵashqy retteýshi boldy. AFSA álemdik ozyq tájirıbeni jetildirý jónindegi jumysty odan ári jalǵastyrýǵa jáne neǵurlym keń halyqaralyq yntymaqtastyqqa jáne baǵaly qaǵazdardy retteý organdarynyń qoldaýyna yqpal etýge nıettenedi.
«Biz úshin IOSCO-nyń Keńeıtilgen MMoU-na qol qoıý mańyzdy, óıtkeni biz quqyq qoldaný salasyndaǵy transshekaralyq yntymaqtastyqqa daıynbyz jáne ashyqpyz. Kapıtal naryqtary jahandanǵan jáne ózara baılanysty ortada jumys isteıdi jáne biz halyqaralyq yntymaqtastyq pen baǵaly qaǵazdar týraly zańdardyń saqtalýyn qamtamasyz etý arqyly naryqtyń tutastyǵyn saqtap, qarjylyq qyzmet tutynýshylaryn qorǵaı alatynymyzǵa senimdimiz», - dedi AFSA-nyń Bas dırektory Muhtar Bóbeev.
Aıta keterligi, AHQO-nyń Qarjylyq qyzmetter kórsetýdi retteý jónindegi komıteti (AFSA) – Astana halyqaralyq qarjy ortalyǵynda qarjylyq qyzmetterdi jáne onymen baılanysty qyzmetti retteý maqsatynda «Astana halyqaralyq qarjy ortalyǵy týraly» Qazaqstan Respýblıkasynyń Konstıtýtsııalyq zańyna sáıkes qurylǵan AHQO-nyń táýelsiz retteýshisi. AHQO erejeleri qarjy kompanııalary men naryq ınstıtýttaryn lıtsenzııalaýdy, tirkeýdi, akkredıtteýdi jáne qadaǵalaýdy qamtamasyz etedi.
Al, Baǵaly qaǵazdar jónindegi komıssııalardyń halyqaralyq uıymy (IOSCO) – ulttyq retteýshilerdi biriktiretin jáne baǵaly qaǵazdar naryǵyn retteýdiń álemdik ereje shyǵarýshy uıymy retinde tanylǵan halyqaralyq qarjy uıymy. IOSCO baǵaly qaǵazdardy retteýdiń halyqaralyq tanylǵan standarttaryn ázirleıdi, engizedi jáne olardyń oryndalýyna yqpal etedi. Uıym G20 jáne Qarjylyq turaqtylyq jónindegi keńespen (FSB) jahandyq retteýshi reforma boıynsha belsendi seriktes.
