AHQO qysqa merzim ishinde aıtarlyqtaı nátıjege qol jetkizdi — Toqaev
ASTANA. KAZINFORM — Memleket basshysy «Astana» halyqaralyq qarjy ortalyǵyn basqarý jónindegi keńes otyrysyn ótkizdi.
Jıyn bastalǵanǵa deıin Qasym-Jomart Toqaev Qarjy ortalyǵynyń ekojúıesin damytýǵa zor úles qosqan qatysýshylar qyzmetimen tanysty.
Freedom Finance Global, China Construction Bank Corporation Astana fılıaly, Fix Price Group, Grata International jáne Binance Kazakhstan Technologies kompanııalarynyń basshylary óz qyzmetteriniń nátıjelerin baıandap, ınvestıtsııalyq jobalar, damý josparlary týraly málimet berdi.
Otyrysty ashqan Memleket basshysy jahandyq kapıtal naryǵyndaǵy qarqyndy ózgerister, jańa halyqaralyq saýda-ekonomıkalyq baılanystardyń qalyptasýy, sondaı-aq elder arasyndaǵy ıntegratsııalyq protsesterdiń nyǵaıýy, qarjy aǵynyn qaıta bólý jaıynda aıtty.
Prezıdenttiń pikirinshe, qazirgi syn-qaterler men ózgerister Qazaqstan úshin jańa múmkindikterge jol ashady.
Osy oraıda Memleket basshysy eldiń ornyqty ári qarqyndy damýyn qamtamasyz etýdegi «Astana» halyqaralyq qarjy ortalyǵynyń mańyzdy róline toqtaldy.
— Salystyrmaly túrde alsaq, qysqa merzim ishinde AHQO aıtarlyqtaı nátıjege qol jetkizdi. Investıtsııa tartý úshin óte yńǵaıly jaǵdaı jasaldy. Onyń aımaqta balamasy joq. Investorlarymyzǵa qolaıly salyq, vıza jáne eńbek rejımi usynyldy. Ár ınvestordy jeke jáne keshendi qoldaý qaǵıdalary engizildi. Ádil ári beıtarap sot júıesi quryldy. Jańa tsıfrlyq sheshimderdiń arqasynda IPO-ǵa qatysý Qazaqstannyń barlyq turǵynyna qoljetimdi boldy, — dedi Qasym-Jomart Toqaev.
Memleket basshysy AHQO aldynda aımaqtaǵy tabysty qarjylyq hab retindegi mártebesin nyǵaıtý mindeti turǵanyna nazar aýdardy. Sondaı-aq birqatar ózekti máselege toqtaldy.
Atap aıtqanda, Prezıdent el ekonomıkasyna odan ári ınvestıtsııa tartýdyń mańyzyn jáne ınvestıtsııalyq ekojúıeni jaqsartý qajet ekenin atap ótti.
— Ortalyq qazirdiń ózinde AQSh, Eýropa, Ulybrıtanııa, Azııa jáne Taıaý Shyǵys elderindegi birqatar seriktestermen tyǵyz yntymaqtastyq ornatty. Birikken Arab Ámirlikteri men Saýd Arabııasynyń iri kompanııalarymen ınvestıtsııalyq jobalardy ilgeriletý boıynsha jumys júrgizilip jatyr. Munyń bári AHQO-nyń ınvestıtsııalyq áleýetin jáne Qazaqstan ekonomıkasyn aıtarlyqtaı nyǵaıtýǵa múmkindik beredi. Degenmen Ortalyq Úkimetpen jáne ulttyq ınstıtýttarmen ózara yqpaldastyǵyn jandandyryp, retteýshi bazany jetildirýdi jalǵastyrýy qajet, — dedi Qasym-Jomart Toqaev.
