AHQO Qazaqstannyń ishki jalpy ónimi ósimin jedeldetedi
ASTANA. QazAqparat - «Astana» halyqaralyq qarjy ortalyǵy Qazaqstannyń ishki jalpy ónimi ósimin jedeldetedi. Bul týraly búgin QR Prezıdenti janyndaǵy Shetel ınvestorlary keńesiniń 29-shy otyrysynda Elbasy Nursultan Nazarbaev aıtty.
«El ekonomısteriniń esepteýleri boıynsha onyń qurýdyń jáne óńirde keńeıýiniń nátıjesindegi qorytyndy jıyntyq tıimdiligi taıaý 10 jylda shamamen 40 mlrd. dollardy quraýy múmkin. buǵan qosa, AHQO aıasynda 2 myńnan astam bilikti jańa jumys oryndary qurylady», - dedi Elbasy.
Sonymen qatar Memleket basshysy AHQO bazasynda Toronto bırjasy úlgisinde jer qoınaýyn paıdalanýshylar úshin alań qurý josparlanyp otyrǵanyn aıtty. Sonyń arqasynda árbir kompanııa óz jobasyn damytý úshin kapıtal tarta alady. Ortalyqta jańa qarjylyq tehnologııalardy qamtý úshin jaıly ahýal, ıkemdi retteýshi orta, málimetterdi óńdeý ortalyǵy túrindegi zamanaýı ınfraqurylym, jańa tehnologııalardy testileýge arnalǵan ınkýbatorlar qurylady.
QR Prezıdenti «Astana EKSPO-2017» bazasyndaǵy joǵary tehnologııalyq ınfraqurylymdar kórmeniń negizgi taqyrybyn, «jasyl ekonomıkany» damytýǵa baǵyttalǵan jobalardy jalǵastyrýǵa múmkindik bererine senimdi.
«Jasyl» oblıgatsııalar shyǵarý, «jasyl» saqtandyrý ınstıtýtyn engizý, «jasyl» bank qurý - bul ortalyq alańynda paıdalanyla alatyn múmkinshilikterdiń birnesheýi ǵana. Bizdiń eń birinshi kezekti mindetimiz - ekonomıkaǵa qarjy resýrstaryn tartý, otandyq qarjy sektoryn álemdik aýqymdaǵy ekonomıkalyq salaǵa aınaldyrý», - dedi Elbasy.
