AHQO Qazaqstan ishindegi ofshorǵa aınalmaıdy – Ortalyq jaýaby
ASTANA. KAZINFORM – «Astana» halyqaralyq qarjy ortalyǵynyń basqarýshysy Renat Bekturov «AHQO Qazaqstan ishindegi ofshorlyq aımaqqa aınalyp jatyr ma?» degen aıyptaýlarǵa jaýap berdi.
– AHQO-da Konstıtýtsııalyq sot bekitken salyq jeńildikteri qarastyrylǵan jáne olar 2016 jyldan 2066 jylǵa deıin 50 jylǵa qabyldanǵan. Kóptegen artyqshylyq qarjy lıtsenzııasy bar qarjy kompanııalaryna arnalǵan. AHQO-da tirkelgen 4 500-den astam kompanııanyń shamamen 150-i jeńildikter alady, qalǵandarynyń bári salyq tóleıdi. Bıylǵy 9 aıda 60 mlrd teńgeden astam salyq jınaldy. AHQO jumys istegen jyldary kompanııalar jalpy 200 mlrd teńgeden astam salyq tólegen, - dedi R. Bekturov KGIR-2025 jahandyq ınvestıtsııalar boıynsha dóńgelek ústel kýlýarynda.
R. Bekturov AHQO-daǵy kompanııalardyń kópshiligi jańadan ashylǵanyn jáne áli dıvıdend tóleý kezeńine shyqpaǵanyn atap ótti.
Sonymen birge barlyq ınvestor kompanııa dıvıdend tóleý kezinde salyqtan bosatylady, bul keń taraǵan halyqaralyq tájirıbe.
– AHQO tek qaǵaz júzindegi bos kompanııalar paıda bolatyn orynǵa aınalmaýy úshin jumys júrgizip jatyr. Bizdiń qaǵıdatymyz: AHQO-da tirkelgen kompanııa tek zańdy tulǵa men mekenjaı bolmaýy qajet. Onda qyzmetkerler bolýy kerek, biz olardyń ınvestıtsııalaryn, mámileler kólemin kórýimiz qajet. Biz de, halyqaralyq qoǵam da osynda ofshorlyq qurylymdar jasaýǵa múmkindik bermeıdi. Qazir búkil álemde ofshorlarmen kúres júrgizilýde. 2019 jyldan beri Ulybrıtanııanyń salyq organdary da bizdi uıymdasqan naryq retinde tanıdy. Sondyqtan halyqaralyq moıyndaý bar jáne biz AHQO-nyń salyqtan jaltarý úshin ofshorǵa aınalýyna jol bermeımiz, - dep tolyqtyrdy ortalyq basshysy.
Buǵan deıin Premer-mınıstrdiń orynbasary — Ulttyq ekonomıka mınıstri Serik Jumanǵarın AHQO arqyly salyq jaltarmaq bolǵan kompanııa týraly aıtqan edi.
Sondaı-aq Renat Bekturov KGIR-2025 jahandyq ınvestıtsııalar dóńgelek ústelinde elimizdiń taý-ken salasyna qandaı ınvestorlar kelip jatqanyn aıtty.