AHQO qarjylyq-quqyqtyq daý-damaılardy sheshýdegi ashyq alań bolady
Atalǵan konferentsııanyń negizgi maqsaty - AHQO Soty jáne AHQO Halyqaralyq arbıtraj ortalyǵynyń (HAO) qyzmetterin jarııalaý, sondaı-aq daýlardy sheshý salasyndaǵy zamanaýı máselelerdi talqylaý úshin ashyq alań ornatý.
Konferentsııanyń saltanatty ashylýyna QR Memlekettik Hatshysy Gúlshara Ábdiqalyqova qatysty.
«Búgingi mańyzdy shara Astananyń 20 jyldyǵy qarsańynda ótip otyr. Elbasy N.Nazarbaevtyń Astana búkil álemge tek jańa elorda, jańa saıası alań retinde ǵana tanylyp qoımaı, sonymen birge tehnologııa, qarjy, zııatkerlik resýrstar quıylyp jatatyn ortalyq retinde tanylsa degen armanynyń júzege asqanyna bárimiz kýá bolyp otyrmyz. Osy oraıda dúnıejúzilik deńgeıdegi AHQO-nyń elimizdiń turaqty damýyna óz úlesin qosary anyq. Sheteldik ınvestorlar úshin ortalyq bizdiń aımaqqa kiretin eń basty qaqpanyń birine aınalady dep senemin», - dedi Memlekettik hatshy.
AHQO-nyń soty óz qyzmetinde táýelsiz jáne Qazaqstan Respýblıkasynyń sot júıesine kirmeıdi. AHQO maqsaty - taraptardyń quqyqtaryn, bostandyqtaryn jáne zańdy múddelerin qorǵaý. Odan bólek AHQO soty qylmystyq jáne ákimshilik sot isin júrgizýdi júzege asyrmaıdy.
«2017 jyly AHQO-nyń Konsýltatıvtik keńesi sátti qurylyp, Anglııa men Ýels quqyǵynyń qaǵıdattary, normalary men pretsedentteri, sondaı-aq álemniń úzdik halyqaralyq qarjy ortalyqtarynyń standarttary negizinde AHQO-nyń qoldanylatyn aktileri bekitildi. Buǵan qosa, jan-jaqty jáne joǵary sapaly zań saraptamasyn qamtamasyz etý úshin tartylǵan jetekshi sarapshy Djon Lıhıdiń joǵaryda atalǵan sharalarǵa belsendi qatysýyn jáne aktilerdi baǵalaýyn da jetistikke jatqyzýǵa bolady», - dedi Astana halyqaralyq qarjy ortalyǵynyń basqarýshysy Qaırat Kelimbetov.
Sonymen qatar, ortalyq basqarýshysy Astana halyqaralyq qarjy ortalyǵy - QR Prezıdenti aıqyndaıtyn dál belgilengen shekarasy bar, qarjy salasyndaǵy erekshe quqyqtyq rejım qoldanylatyn jáne qarjylyq-quqyqtyq máseleler men daý-damaılardy zamanaýı turǵydan qarastyryp sheshetin ashyq alań bolatynyn aıtty.
