AHQO qarjy sektoryn damytýmen qatar, ekonomıkaǵa ınvestıtsııalar tartýy tıis - Qasym-Jomart Toqaev
Otyrysqa Keńes tóraǵasy - QR Premer-Mınıstri Asqar Mamın, QR Qarjy mınıstri Álıhan Smaıylov, Ulttyq ekonomıka mınıstri Rýslan Dálenov, Ulttyq bank tóraǵasy Erbolat Dosaev, AHQO Basqarýshysy Qaırat Kelimbetov, sondaı-aq Keńes músheleri: Eýropalyq qaıta qurý jáne damý bankiniń prezıdenti Sýma Chakrabartı, JP Morgan Chase International Dırektorlar keńesiniń tóraǵasy Djeıkob Frenkel, Reseı Sberbankiniń prezıdenti jáne basqarma tóraǵasy German Gref, Islam damý banki tobynyń prezıdenti Bandar Hadjar, «ıAndeks» kompanııalar tobynyń basshysy jáne negizin qalaýshylardyń biri Arkadıı Voloj, Citigroup ınvestıtsııalyq jáne korporatıvtik bankiniń úkimetter men memlekettik sektor jónindegi jahandyq blogynyń basshysy Djýlı Monako qatysty.
Qasym-Jomart Toqaev óz sózinde Keńestiń jańa múshelerine rızashylyǵyn bildirip, sheteldik ınvestorlardyń kúsh-jigeri men qoldaýynyń arqasynda «Astana» halyqaralyq qarjy ortalyǵynyń (AHQO) aldaǵy jumysyna negiz qalanǵanyn atap ótti.
- Resmı túrde iske qosylǵannan beri bir jyl ishinde Halyqaralyq qarjy ortalyǵy bedeldi qarjy ortalyqtarynyń jahandyq ındeksi boıynsha 37 pozıtsııaǵa kóterilip, 51-shi orynǵa ıe boldy. AHQO tabysty jumys isteýi úshin barlyq jaǵdaı jasalǵan, qajetti ınfraqurylym bar. Endi bizge naqty nátıjelerge qol jetkizý kerek, - dedi Memleket basshysy.
Qasym-Jomart Toqaev Nur-Sultan qalasy álemge tanymal halyqaralyq qarjy ortalyǵyna aınalyp kele jatqanyn atap ótti.
- Álemniń jetekshi sáýletshileri elordanyń biregeı beınesin jasady. Endi dúnıejúziniń belgili qarjygerleri osy jerde tabysty qarjy ortalyǵyn qalyptastyrýǵa atsalysatyn kez keldi. Ortalyq qarjy sektoryn damytýmen qatar, ekonomıkaǵa ınvestıtsııalar tartýy tıis. AHQO bazasynda keleshegi zor jobalardy qarjylandyrý jónindegi negizgi mámileler jasalýy qajet. Bul jerde «Qazaqtelekom», «Qazmunaıgaz», QTJ, «Eır Astana» syndy ulttyq kompanııalardyń IPO-sy ótedi, - dep atap ótti Qazaqstan Prezıdenti.
Otyrys barysynda AHQO-nyń jyldyq esebi boıynsha resmı tanystyrylymy ótti.
