AHQO ıslam qundy qaǵazdaryn damytýǵa baǵyttalǵan zań jobasyn ázirleýde
ASTANA. QazAqparat - Astana halyqaralyq qarjy ortalyǵy ıslam qundy qaǵazdaryn damytýǵa baǵyttalǵan zań jobasyn ázirleýde. Bul týraly búgin elordada ótip jatqan IFN TMD forýmynda atalǵan ortalyqtyń basshysy Qaırat Kelimbetov málim etti, dep habarlaıdy QazAqparat.
«Búgin TMD elderindegi ıslamdyq qarjylandyrý júıesin damytýǵa arnalǵan arnaıy konferentsııa ótip jatyr. Bul konferentsııaǵa tek Qazaqstannan ǵana emes, Ortalyq Azııa memleketteriniń, TMD elderiniń ókilderi qatysýda. Jalpy, Astana halyqaralyq qarjy ortalyǵy ıslamdyq qarjylandyrý júıesin damytatyn bolady. Ózderińiz de biletindeı, bul baǵyttaǵy Elbasynyń arnaıy tapsyrmasy da bar. Biz jumysty 2009 jyly bastap, qazirgi ýaqytta birshama jaqsy nátıjege qol jetkizip otyrmyz. Sarapshylardyń paıymynsha, Qazaqstan ıslamdyq qarjylandyrý joǵary deńgeıde damyǵan elderdiń qatarynda qosyldy. Islamdyq qarjylandyrý júıesin odan ary damytýǵa baǵyttalǵan arnaıy josparymyz da bar», - dedi Kelimbetov.
Onyń atap ótýinshe, Astana halyqaralyq qarjy ortalyǵy ıslam qundy qaǵazdaryn, ıaǵnı sýkýkty damytýǵa baǵyttalǵan zań jobasyn ázirleýde.
«Islamdyq qarjylandyrý naryǵy barynsha úlken, shamamen 2 trln. dollardy quraıdy. Qazirgi ýaqytta kóptegen elder ıslamdyq qarjylandyrý naryǵyn damytýǵa basa nazar aýdaryp otyr. Buǵan deıingi 30 jyl boıy ıslamdyq qarjylandyrý dástúrli túrde Taıaý Shyǵystyń ıslam elderinde, Malaızııada damyǵan bolsa, qazirgi ýaqytta ıslamdyq qarjylandyrý múmkinshilikterine kóptegen elder júgine bastady. Ulybrıtanııa, Lıýksembýrg, Japonııa, Gonkong syndy elderde ıslamdyq qarjylandyrý qarqyndy damyǵan. Sondyqtan Qazaqstan da ıslamdyq qarjylandyrýdy damytý múmkinshilikterin qarastyrý ústinde»,- dedi AHQO basshysy.
